NEGMA

2010-10-06T03:19:00.003+03:00

احساس غريب بيتسلل جوه قلبي مبسوطه منه لكن برضة خايفة ، خايفة اقوم الصبح ألاقي نفسي في يوم عادي بدل ما كنت باستمتع باشارات المرور والزحمة و اعتبرها فرصة للتأمل في الدنيا وأحوالها ،و الخناقات في الشغل مجرد اختلاف في وجهات النظر والدنيا بمبي في بمبي، خايفة أقع علي جدور رقبتي و ما ألاقيش حد يمد لي ايده ...نفسي الاحساس بالرضا ده يستمر ادعو لي انه يستمر..

2010-08-26T17:14:00.003+03:00

في وسط زحمة رمضان و العزومات و الخروجات و الأكلات في ناس تانية بتموت من الجوع و الألم والمرض في باكستان و مع الأسف محدش حاسس بيهم ، علي الأقل في مصر ......

تخيل ربع مساحة باكستان الشاسعة مغطاه بمياه الفيضانات بما فيها الأراضي المزروعة يعني كمان معظم المحاصيل الزراعية باظت ، بلغ عدد المتضررين 20 مليون شخص فقدوا منازلهم و شردوا و فقدوا اقاربهم ،1500 حالة وفاه ، و 650 ألف مشرد معظمهم من الأطفال و النساء تحيط بهم الأمراض الخطيرة من كل جانب و نقص الطعام و الشراب والمأوي .

أنا علي حد علمي باكستان دولة صديقة و مسلمة واجب علينا مساعدتها في الكارثة دي ، وحتي لو مش صديقة و مش مسلمة برضو واجب علينا مساعدتها بجد ،مش مجرد طائرتين سد خانة عشان لو حد سألنا نبقي عملنا اللي علينا ... بلاش فلوس عشان ما معاناش ،علي الأقل يكون فيه مستشفي ميداني في الأماكن المتضررة ونبعث دكاترة و مهندسين و بناءين متطوعين عشان يساعدوهم يبنوا نفسهم من تاني بسرعة ...و متهيألي كده تبقي صدقة في رمضان ولا ايه...

2010-06-23T19:31:00.001+03:00

حسبي الله ونعم الوكيل في الظالم

في أوروبا و الدول المتقدمة

2010-06-22T00:24:00.002+03:00

لما درجة الحرارة في الكام يوم دول توصل لحد 45 وفي بعض المدن 47 و 50 كمان ( أسوان) و ناس بتموت من الحر http://www.masrawy.com/News/Cases/General/2010/june/21/death.aspxوناس يغمي عليها من الشمس ده غير طبعا ضربة الشمس اللي بقت عادي خالص و الحكومة عاملة نفسها مش واخدة بالها من حاجة و و ودن من طين و التانية من عجين و امتحانات الثانوية العامة والكليات المختلفة مستمرة في ظروف غير أدمية بالمرة و فصول وقاعات مفيهاش ابسط وسائل التهوية ولا حتي مروحة ده غير طبعا صعوبة الامتحانات اللي ترفع الضغط لوحدها ، اللي أعرفة و اسمع عنه من زمان ان الحرارة لما تزيد عن 50 درجة مئوية تبقي أجازة رسمية مدفوعة الأجر لجميع القطاعات أو علي أقل تقدير ينبهوا علي الناس في كل مكان علي أهمية شرب الميه و السوائل والابتعاد عن الشمس المباشرة و ارتداء الملابس المريحة و النضارة الشمسية و ياريت لو في كريم مضاد لأشعة الشمس يبق أحسن وا حسن و يا سلام لو يوزعوا علي الناس زجاجات مية مجانا في الشوارع و شمسيات ان شاء الله حتي ورق و يحاولوا يقللوا من زحمة الواصلات و يوفروا أتوبيسات كتيرة للناس عشان ما يقفوش في الشمس كتير و تندات في المواقف للحماية من الشمس و يعلنوا حالة الطوارئ في المستشفيات خاصة لحالات كبار السن و الأطفال ........ياااااه أسفه جدا يا جماعة أنا سرحت و نسيت اني باتكلم عن مصر.

و من أحياها فكأنما أحيا الناس جميعا

2010-06-20T22:24:00.004+03:00

هو لسة فيه كدة، لسة فيه حد بيمد لك ايده و يلحقك قبل ما تغرق بلحظة ... بهفوه ... بفسوة ... أنا كنت فاكرة ان الناس دي خلاص موضة وانتهت ، لكن لسه فيه ... لسه في حد ممكن يندهلك و انت خلاص هاتقع و يمد لك ايده و يبتسم و يساعدك أكتر حتي من مقدرته ، حد ممكن تحمد ربنا انك تعرفة ، وان ربنا زقه في طريقك لسبب معين ما تعرفوش لكن بعد فترة تدرك حكمته ... و تبقي مش عارف تعمل ايه ولا ايه عشان تشكرة .......... بالرغم من سواقين الميكروباص و غباوتهم ، وموظفين الحكومة و غلاستهم ، و لميس الحديدي و عمرو عبد السميع و تناكتهم .... مصر لسة ناسها بخير والله بخير ....

2010-05-15T17:55:00.004+03:00

النهاردة ذكري النكبة الفلسطينية ، حاولت أكتب حاجة عنها فوجدت ان الصورة أفضل من ألف كلمة ، و تعبر عن حاجات كتير جوانا كلنا

إنها قصة عمري 2

2010-02-25T12:26:00.004+03:00

وبعد فترة طويلة من الانتظار جاءنا الرد من الأسود بالموافقة وكان ذلك اليوم يوم فرح واحتفالات و كأننا وقعنا معهم المعاهدة بالفعل ،ثم جاءت ساعة الحسم ، اصبح واجبا علي أبي أن يلتقي مع الأسود ليتناقشوا علي شروط الاتفاقية ، وكان أبي يتهرب من هذا اليوم بقدر ما كان سعيدا بأنة يكتب التاريخ من جديد. وفي اليوم المحدد ذهبت مع أبي لمنطقة محايدة اتفقنا عليها مسبقا لعقد المفاوضات بحضور الثعالب ، في الطريق إلي هناك كنت أسمع دقات قلبي وقلب أبي يتقافزان من مكانهما ، ولكننا وصلنا اخيرا . لا أدري ما الذي جعلني لا أرتاح لنظرات الأسود و لكنهم كانوا كعادتهم ينظرون بترقب. عرضنا عليهم اقتراح الهدنة . فقال أحدهم :" ولكن ما الذي نحصل علية مقابل هذة الهدنة ؟! نحن لن نستفيد أي شيئ بل لن نجد ما نأكله وأنتم تعلمون كيف نشتهي لحومكم و نفضلها علي لحوم سائر الحيوانات. فأجاب أبي :" نحن مستعدون لتقديم أي ضمانات لتوقيع تلك المصالحة." أطرق زعيمهم طويلا ثم قال :" اننا سنمتنع عن صيدكم كل عام مده 6 أشهر فقط وباقي العام مسموح لنا الصيد ،هه ما رأيكم؟!" أجاب أبي سريعا : " 6 أشهر فقط ،كنا نعتقد أن وقف الصيد سيدوم دائما ، ولن يقتل منا أحد بعد ذلك" فضحك زعيم الأسود طويلا ثم قال: " دائما ، انت متفائل جدا، ألم أقل لك أننا نحب لحومكم جدا ...امم ما رأيك في 9 أشهر أعتقد أن هذا اتفاق عادل ." أجاب أبي : " حسنا هذا أفضل من لا شيئ ..و الثلاثة شهور الباقية ستصطادون فيها أليس كذلك ؟!" رد كبيرهم : " ماذا؟ ...نصطاد ؟ لا ...لا أنتم الذين ستقدمون الينا الضحية بأيديكم ...لقد كنا نصطاد من قبل بأنفسنا أما الآن فيجب عليكم أن تقدموا مقابلا لتلك الهدنة فأنتم الذين اقترحتموها في أول الأمر."
قال أبي : "أنا لا أفهمك ... ماذا تقصد ؟"
" يجب عليكم أن تقدموا الينا أحد أفراد القطيع كل ثلاثة أيام طوال هذة الشهور الثلاثة ، فنحن محرومون من لحومكم باقي العام ، ما رأيك؟" أطرق أبي قليلا ثم قال "ولكن هذا صعب جدا ، نختار احدنا ليلقي حتفه ، هذا شيئ فظيع ."
" كما تريد ...اذن نعود لسابق عهدنا وكأن شيئا لم يكن " " لا لا أرجوك ... حسنا أنا موافق " وتم عند ذلك التصديق علي الاتفاقية و أصبحت أول اتفاقية في الغابات كلها تعقد بين الأسود و قطعان الجاموس بل بين الحيوانات كلها. وعندما عدنا إلي قومنا واخبرناهم بعقد الاتفاقية بدأت الأفراح و الهتافات لأبي في كل مكان دون أن يعرف أحد ببنود الاتفاقية و لكن في غمرة هذة الاحتفالات سأل أحد أفراد القطيع أبي عن بنود الاتفاقية ، حاول أبي أن يتهرب من الاجابة بدبلوماسية ولكنه حاصرة بالأسئله أمام القطيع كله مما اضطرة أن يفصح عن شرط الاتفاقية الوحيد ، وما إن فعل حتي هاج القطيع لفترة طويلة و لم يستطع أحد أن يسيطر عليهم و ظلوا علي ذلك فترة طويلة حتي تقبلوا الوضع أخيرا و أصبح أمرا واقعا أن يصطادوا للثعالب و أن يختاروا كل 9 شهور شهداء يقدمونهم قربانا للسلام مع الأسود ، ولكن بعضهم لم ينسي ابدا تسرع أبي في توقيع المعاهدة . و كان نتيجة ذلك مقتله، ففي أحد الأيام وجدنا جثة أبي في احد الطرقات ومن التحقيقات علمنا أن أحد أفراد القطيع قد اتفق مع الثعالب علي قتله و رغم ذلك لم نستطع التملص من الصيد للثعالب وهددونا بأننا إن توقفنا عن الصيد فإن الاتفاقية تنهد من اركانها ولذلك رضخنا لهم . بعد ذلك أصبح أحد المقربين من أبي زعيما علينا و حافظ علي السلام الذي أقامه أبي و لكن في أول فرصة اختارني جميع القطيع لأصبح شهيد السلام التالي .
ولذلك ففي طريقي إلي مثواي الأخير وهو معدة الأسود رويت لكم حكايتي ربما تعتبروا بها ولكني أشك في ذلك.

إنها قصة عمري

2010-01-13T22:42:00.005+03:00

هذه قصة حياتي قد تكون غريبة لكنها حقيقة ، اتمني ان يعتبر منها البشر لأني سمعت ان بني آدم مهتمين بالقراءة و معرفة تجارب الآخرين عن طريق الكتب والقصص ، طبعا نفسكم تعرفوا انا مين ، أنا جاموسة ، دي مش شتيمة ولا قلة أدب انا فعلا جاموسة برية، طبعا هتقولوا ان الكلام ده مش حقيقي و اشتغالة دمها تقيل لأن الجاموس مش بيعرف يقرا ويكتب ، خصوصا علي النت لكن دي قصة طويلة هاحكيها لكم بعدين ، بصراحه انا حبيت اكتب مذكراتي في أواخر ايامي يمكن حد يستفيد منها.
حكايتي تبدأ من كام سنة مش عارف كام بالضبط لأني مش باعرف احسب السنين ، كنا ايامها بنهاجر من مرعي لمرعي آخر ممكن تتخيل ان الحكاية دي بسيطة جدا لكننا نفقد كثير من اعضاء القبيلة كل سنة في الهجرة بسبب الحيوانات المفترسة التي تهاجم القطيع و طبعا تركز علي الحيوانات الشاردة كبيرة السن أو الصغيرة ، قبيلة الأسود كانت اكثر قبائل الحيوانات المفترسة بالنسبة لنا ، بيحبوا لحمنا جدا خصوصا صغار السن منا ، وفي احد الأيام الحارة كالعادة كانت قبيلتنا تنطلق بسرعة كبيرة وكنت انا و صديق لي في مؤخرة القطيع نلعب و نلهو معا وفجأه لاحظنا قطيع من اللبؤات يراقب من بعيد ، في تلك اللحظة امر أبي قائد القطيع بالتوقف كي نشرب و نرتاح قليلا، و عندما تقدمت ناحية البحيرة لأروي عطشي هجم علي قطيع اللبؤات ، كانوا حوالي ثلاث لبؤات ، حاولت ان اخلص نفسي وظللت اصرخ ليسمعني باقي القطيع ، ولكن مخالبها كانت تنغرز في رقبتي و في أنفي وفي كل مكان بجسدي ، لكن لحسن حظي لمحني أبي ونبه باقي القطيع الذي جاء مسرعا لنجدتي ، وبنطحه واحدة من أبي طارت احدي اللبؤات من فوق رقبتي وتبعتها الأخريات ، كانت لحظات مريرة قضيتها بين الحياة والموت ، ولم انساها أبدا ، من هذة اللحظة بدأ أبي يفكر جديا في العداء الشديد بين الجاموس و الأسود و كثيرا ما صارح أمي برغبته في عقد صلح مع الأسود كي يقي الأجيال الجديدة شر الموت بين أنياب الأسود ، لكن أمي كانت تتهمه دائما بالجنون قائلة ان هذا العداء قد خلقة الله منذ الأزل و لن يزول الا بانتهاء الحياه نفسها لكنه ظل مؤمنا ان رغبة الحيوانات يمكنها ان تحقق المعجزات .

وفي أحد الأيام خرج أبي علينا مهموما و كأنه يحمل الدنيا علي قرنيه وصرح لنا انه سوف يلقي خطابا مهما علي القطيع، و تطايرت الأنباء لكل أفراد القطيع الذين تجمعوا حول أبي ليلقي عليهم خطابه الهام قبل أن ننطلق في رحلتنا اليومية ، وقف وسط القطيع وقال:" اصدقائي و اخواني طبعا كلكم لاحظتم كيف تتحرش بنا الأسود و اللبؤات طول عمرنا ، فمن منا لم يفقد ابن أو أخ أو أم في رحلات الهجرة كل عام حتي أنا كنت سأفقد ابني ،لذلك فقد قررت ان نبدأ في المباحثات مع الأسود لعقد سلام دائم بين الطرفين ،فما رأيكم ؟؟! "
بدأ الهمز و اللمز بين القطيع و تزايدت النظرات الشاردة المتعجبة من القرار الغريب لكن أبي استطرد قائلا:" اريد مجموعة من المتطوعين لتذهب و تناقش الأسود في هذا المقترح" و فجأه ساد الصمت فمن هو المجنون الذي يذهب بقدمية إلي عرين ألد اعدائه ، صاح أحد الحاضرين :" مستحيل طبعا حد يروح للأسود برجليه انت عاوز ترمينا في النار ."
فرد أبي :" عندك حق ،لكننا مضطرين لابلاغ الأسود بهذا القرار حتي نتشاور معهم ونعرف رأيهم ." صاح أحدهم من الخلف:" ايه رأيكم في الثعالب ،دول محايدين وممكن نكلفهم بالمهمة الخطيرة دي." رد أبي :" فكرة عبقرية ، فليكن اذن ،الثعالب، سأكلف ابني ان يذهب للثعالب و يشرح لهم الأمر حتي يمكنهم اقناع الأسود ، هيا يا بني اذهب اليهم،وافعل اي شيء ليقبلوا تلك المهمة ."
فتوجهت من فوري للثعالب كانت المسافة إليهم ليست بعيدة ،و لكني كنت اشعر اني أمشي منذ ايام من شده خوفي أن تخرج علي الأسود و أنا وحيد فلا يدافع عني احد، ولكني وصلت اخيرا، كانت عيون الثعالب تنظر لي باستغراب فتلك أول مرة يذهب إليهم جاموس بري ، و عندما طلبت مقابلة كبيرهم كانت الدهشة أكبر، وحدثته بما اقترحة أبي و رأيت أنه انبهر بالفكرة و بدأ بالثناء علي والدي الذي توصل لهذة الفكرة العبقرية، وفي النهاية قال لي :" ولكن ماذا نستفيد نحن معشر الثعالب اذا توجهنا لعرض تلك الفكرة علي الأسود، وانت تعلم جيدا طبعها وربما لايعجبهم الأمر فيبطشون بي، ولي أولاد و عشيرة أنا المسئول عنهم ..... أنا لي رأي ارجو ان تعرضه علي والدك أنا أوافق أن أكون واسطه هذا الاتفاق لكن بشرط أن تصطادوا لي و لعشيرتي كل يوم، ربما لا أعود من مقابلة الأسود فيجب عليكم رد جميلي و تتكفلون بعشيرتي ، أما اذا عدت فيجب عليكم مكافأتي علي العمل الجبار الذي قمت به نيابة عنكم ، اعرض هذا الرأي علي أبيك ثم عد بالرد سريعا."
في رحلة العودة كنت أعلم جيدا ماذا سيكون رد أبي ، فقد استحوذ هذا الأمر علي تفكيرة ولن يتنازل عنه مهما كان الثمن.. وبالفعل حدث ما توقعته و وافق أبي رغم اعتراض معظم افراد القطيع و تم الأمر سريعا و كلف مجموعة من الأفراد بالصيد يوميا لصالح الثعالب و كان هذا أمرا صعبا جدا فنحن غير مدربين علي الصيد . واخيرا اصبحنا في انتظار رد الأسود الذي تأخر طويلا..........
يتبـــــــــــــــــــــــــــــــــــــــــــــع

2009-12-23T02:21:00.002+03:00

لما قعدت مع نفسي و فكرت في الخيارات المهمة في حياتي لقيتها مجرد مجموعة من التنازلات يعني مثلا في مرحلة الطفولة كان نفسي ابقي دكتورة اطفال زي كل احلام البنات الصغيرين لكن في الثانوية العامة لقيت نفسي باكرة الفيزياء و بيني و بين الكيمياء عداء فظيع و طبعا اتنازلت عن اول حلم في حياتي بعد كدة حلمت اني أكون صحفية ، اكشف الفساد واعمل تحقيقات نارية تفضح المرتشين والحرامية وتكشف الحقايق المخفية حلم مثالي من احلام المراهقة لكن مكتب التنسيق كان له رأي تاني وطبعا اتنازلت عن تاني حلم ، اما حلمي الجديد ان يكون لي بيت ملكي افرشه علي مزاجي مع واحد بحبه وبيحبني لكني طبعا مضطرة اتنازل زي كل مرة لأن بطرس غالي مزنوق في القرشين وقرر يستلفهم من المواطنين الاغنيا عن طريق الضريبة العقارية لأنه شايف ان الناس عمالين يبعتروا فلوسهم يمين و شمال علي كلام فارغ اشي أكل و اشي لبس واشي دروس خصوصية و مواصلات يعني حاجات رفاهية جدا و الحكومة أولي بالفلوس دي ....

كلمتين محشورين في زوري

2009-12-18T00:24:00.003+03:00

قناة النيل الثقافية لا تليق ابدا انها تكون قناة مصرية ، اعتقد ان المعدات اللي في قناة السودان الفضائية احدث من المعدات اللي في قناة النيل الثقافية يا ما يلغوها يا ما يحدثوها و يريحونا

كلنا في الهم سوا

2009-12-14T03:03:00.004+03:00

كل الانظمة العربية الديكتاتورية بتستخدم نفس الأسلوب ما يفرقش س عن ص كل الشتيمة والضرب و القطيعة ما بين مصر والجزائر كان سببها أمريكا ، هاتقولي بقي بلاش نظرية المؤامرة اللي جابتنا لورا دي ، لكني مش قصدي نظرية المؤامرة أنا اقصد امريكا فعلا و الحكاية تبدأ ان امريكا عاوزة تمد سيطرتها في شمال أفريقيا و احسن طريقة لكده ان يبقالها قواعد عسكرية في المنطقة واحسن بلد للقواعد دي هي الجزائر متوسطنه علي الخريطة و بتبص علي شمال افريقيا من كل حته ، لكن عشان الحكومة الجزائرية تنفذ الصفقة دي لازم تاخد حاجة في المقابل و كان المقابل حماية الجنرالات من التعرض لمحاكمات دولية بسبب جرائم الحرب اللي حصلت ايام الحرب علي الارهاب و طبعا ده تمن حلو و اخر تمام يبيعوا بيه البلد لكن فيه مشكلة صغيرة و هي ان الشعب ممكن لا قدر يعترض ، طب ايه الحل نعمل لهم هوجة يتلهوا فيها و مفيش احسن طبعا من الكرة ينشغلوا بيها علي ما الشغل الكبير يتظبط .......... اوعي تسب وتلعن في الجزائر او حتي في الحكومة الجزائريه و افتكر ان مصر بدأت في بناء سور حديدي او بمعني اصح فولاذي علي طول الحدود مع غزة عشان يبقي سجن كبير لكل أهل غزة بمباركة امريكية .......يلا بقي دلوقتي تقدر تسب وتلعن في البلدين.

محاولة أخيرة لإنقاذ الأرض

2009-12-07T22:57:00.003+03:00

بدأ اليوم مؤتمر كوبنهاجن للمناخ في محاولة لانقاذ الأرض و يهدف المؤتمر إلي اتفاق 192 دولة علي خفض درجة حرارة الأرض درجتين مئويتين ، و ضمان اعتماد مالي للبلدان الأشد تضررا من التغيرات المناخية ، لتحل توصيات ذلك المؤتمر محل بروتوكول كيوتو - الذي رفضت الولايات المتحدة التوقيع عليه - و الذي ينتهي العمل به في 2012. ورغم التوقعات السلبية حول جدوي المؤتمر وسيطرة الدول الكبري عليه إلا أنه يشارك فيه 100 رئيس دولة ...الجدير بالذكر ان منطقة الشرق الأوسط وشمال أفريقيا من أكثر المناطق تضررا و أقلها استعدادا لمواجهة التضرر ولا داعي ان اذكركم بمسألة غرق دلتا النيل التي اعترفت بها الحكومة أخيرا بعد جدل عقيم و ندعو الله أن تبدأ في التفكير في حل ينقذ الاراضي الزراعية التي تعتمد عليها نسبة كبيرة من السكان و بلغة الأرقام اذا زاد مستوي البحر المتوسط بمعدل متر واحد فانه سيؤدي لتدمير 12.5% من مساحة الأراضي الزراعية و تضرر 9.5% من الأماكن المأهولة بالسكان كل تلك الأضرار بالرغم من أن نصيب مصر من الغازات الدفيئة 0.6% بمعني أخر نحن ندفع فاتورة صناعات البلدان الكبري دون ان يكون لنا دخل فيها بل اننا نستقبل بصدر رحب المصانع الملوثة للبيئة التي يطردونها من بلدانهم مثل مصانع الاسمنت و السيراميك ولذلك يحاول وفد مصر برئاسة وزير البيئة - اللي معرفش اسمه ولا عايزة اعرفة لأنها مش هتفرق كتير- ضم مصر إلي الدول الأشد تضررا بهدف الحصول علي المنحة المالية المخصصة لتحسين الأحوال البيئية ...يعني من اللأخر احنا رايحين ناخد قرشين و نرجع.

عالم الحيوان ( :

2009-12-07T00:36:00.003+03:00

من الدايلي تليجراف

2009-11-26T19:44:00.001+03:00

أضحي سعيد

2009-11-16T02:49:00.002+03:00

هي حصلت لحد كدة ... بعد الماتش المنتظر بين مصر والجزائر اللي غلبنا فيه 2-0 تهجم المتعصبين الكروين في الجزائر علي مقار الشركات المصرية - مصر للطيران و ارواسكوم تليكوم و المقاولين العرب لحد د لوقتي -و منازل المصريين العاملين هناك بسبب اشاعة تسببت فيها جريدة الشروق الجزائرية عندما نشرت خبر مقتل مشجعين جزائريين علي ايدي مشجعين مصريين بعد المبارة و في الحقيقة ان كل اللي حصل هو مشاحنة بين الصحفيين المصريين والجزائرين و خرج منها الجميع سالمين لكن الشروق كعادنها تفضل الحصول علي سبق صحفي علي حساب ارواح الناس ، نفسي اعرف احساس الصحفي ده هيبقي اية لو حد من المصريين لا قدر الله جراله حاجة هل تستاهل ترقيته التضحية بحياة طفل أو أم أو شاب ائتمنهم علي حياته وماله.

هذا عتاب الحب للأحباب - فاروق جويدة

2009-11-14T12:33:00.002+03:00

«تساءلوا: كيف تقول: 
هذى بلاد لم تعد كبلادى؟! 
فأجبت: 
هذا عتاب الحب للأحباب» 

لا تغْضَبـِى من ثـَوْرَتِى.. وعتــابـــى 
مازالَ حُّبــــكِ محنتى وعــــــــذابى 
مازالتِ فى العين الحزينــــةِ قبلـــــة ً 
للعاشقين بسحْـــركِ الخَـــــــــــلاَّبِ 
أحببتُ فيكِ العمرَ طفــــلا ً باسمــــًا 
جاءَ الحيــاة َ بأطهـر الأثـــــــــوابِ 
أحببتُ فيكِ الليلَ حيــــن يضمنـــــــا 
دفءُ القلــوبِ.. ورفـْقــَة ُ الأصحابِ 



أحببتُ فيـكِ الأم تـَسْكـــُنُ طفلهَــــــا 
مهما نأى.. تلقــاهُ بالتــَّـــرْحَـــــابِ 
أحببتُ فيكِ الشمسَ تغسلُ شَعْــــرها 
عنـدَ الغروبِ بدمعها المُنـْسَــــــابِ 
أحببتُ فيكِ النيلَ يجــرى صَاخبــــًا 
فـَيَهيمُ رَوْضٌ..فى عنــــَـاق ِ رَوَابِ 
أحببتُ فيكِ شموخَ نهــر جامـــــــح ٍ 
كم كان يُسكرنــى بــغيـر شَــــرَابِ 
أحببتُ فيكِ النيلَ يسْجُــد خاشعِــــــا 
لله ربــــًّــــا دون أى حســــــــابِ 
أحببتُ فيكِ صلاة َ شعــبٍ مُؤْمــــن 
رسمَ الوجـودَ على هُدَى مِحْـــرَابِ 



أحببتُ فيكِ زمانَ مجـــدٍ غَابـــــــــر ٍ 
ضيَّـعتــِـهِ سفهـــــًا على الأذنـــَـابِ 
أحببتُ فِى الشرفـــاء عهدًا باقيــــــًا 
وكرهـتُ كلَّ مُقـــــامر ٍ كـــــــذابِ 
إِنى أحبــــكِ رغــــــم أَنى عاشــــقٌ 
سَئِم الطوافَ.. وضـاق بالأعْـتـابِ 
كم طاف قلبى فى رحابـــِـكِ خاشعًا 
لم تعرفى الأنـْقـى.. من النـصـــَّابِ 
أسرفتُ فى حبــــى.. وأنت بخيلـــــة ٌ 
ضيعتِ عمرى.. واسْتـَبَحْتِ شَبَابى 
شاخت على عينيكِ أحلامُ الصبـــــا 
وتناثرت دمعـــا على الأهــــــــدابِ 


من كان أولـَى بالوفاء ؟!.. عصابة َُ 
نهبتكِ بالتدليـــــس.. والإرهـــــابِ ؟ 
أم قلبُ طفـل ذاب فيــــك صبابـــــة ً 
ورميتهِ لحمًـــا على الأبــــــــوابِ ؟! 
عمر من الأحزان يمـرح بيننــــــــا.. 
شبحُ يطوف بوجهـــهِ المُرْتــــــــَابِ 
لا النيلُ نيلـُكِ.. لا الضفافُ ضفافهُ 
حتى نخيلـُك تاهَ فى الأعشـــــــابِ ! 
باعُوكِ فى صخبِ المزادِ.. ولم أجد 
فى صدركِ المهجور غيرَ عـــذابى 
قد روَّضُوا النهرَ المكابـِرَ فانحنــــــَى 
للغاصبيـــــــن.. وَلاذ بالأغْــــرَابِ 



كم جئتُ يحملنى حَنِينٌ جــــــــــارفٌ 
فأراكِ.. والجلادُ خلـفَ البَــــــــابِ 
تـَتـَرَاقـَصين علـَى الموائـــــد فرحة ً 
ودَمِى المراقُ يسيل فى الأنخــــابِ 
وأراكِ فى صخب المزاد وليمــــــة ً 
يلهو بها الأفـَّاقُ.. والمُتصـــــــابى 
قد كنتُ أولى بالحنان ِ.. ولم أجـــــدْ 
فى ليلِ صدرك غيرَ ضـوءٍ خــابِ 
فى قِمة الهَرَم ِ الحزين ِ عصابـــــة ٌ 
ما بين سيفٍ عاجز ٍ.. ومُـــــــرَابِ 
يتعَبَّدُون لكــــل نجــــــــم ٍ سَاطِــــع ٍ 
فإذا هَوَى صاحُوا: «نذيرَ خَرَابِ» 



هرمُ بلون ِالموت ِ.. نيلٌ ساكــــــنٌ 
أسْدٌ محنطـــــــــــة ٌبلا أنـْيَــــــــابِ 
سافرتُ عنكِ وفى الجوانح وحشــــة ٌ 
فالحزنُ كأسِى.. والحَنِينُ شَــرَابى 
صوتُ البلابـِل ِغابَ عن أوكــــــاره 
لم تعبئى بتشــــــردى.. وغيــــابى 
كلُّ الرفاق رأيتـُهـــم فى غربتـــــــى 
أطلالَ حُلم.. فى تـِلال ِ تـــــُرَابِ 
قد هاجروا حُزْنـًا.. وماتوا لوعـــــة ً 
بين الحنين ِ.. وفـُرقةِ الأصحــابِ 
بينى وبينك ألفُ ميــــــل ٍ.. بينمـــــــا 
أحضانـُك الخضراءُ للأغْــــرَابِ! 



تبنين للسفهــــــــاء عشـًّـــــا هادئـــــا 
وأنا أموتُ على صقيع شبابــــى ! 
فى عتمةِ الليل ِ الطويـــل ِ يشــــــدنى 
قلبى إليكِ.. أحِنُّ رغم عــــــذابى 
أهفو إليك.. وفى عُيُونِكِ أحتمـــــــى 
من سجن طاغيةٍ وقصفِ رقــابِ 
* * * 
هل كان عدلا ً أن حبَّـكِ قاتـــلـــــــى 
كيف استبحتِ القتلَ للأحبــــــابِ؟! 
ما بين جلادٍ.. وذئــــــــــب حاقــــــدٍ 
وعصابةٍ نهبتْ بغير ِ حســــــــابِ 
وقوافلٍ للبُؤس ِ ترتـــــــــعُ حولنــــــا 
وأنين ِ طفلٍ غاص فى أعصــابى 


وحكايةٍ عن قلبِ شيــخ عاجــــــــــٍز 
قد مات مصلوبًا على المحـــــرابِ 
قد كان يصرخ: «لى إلـــــهٌ واحــدٌ 
هو خالق الدنيـا.. وأعلـــمُ ما بى» 
ياربِّ سطـَّرت الخلائـــقَ كلهَّـــــــا 
وبكل سطـر ٍ أمــــــة ٌ بكتــــــــابِ 
الجالسونَ على العروش توحَّشُــوا 
ولكل طاغيـةٍ قطيــــــــعُ ذئـــــابِ 
قــد قلـــــــتُ:إن الله ربٌّ واحـــــدٌ 
صاحوا:»ونحن» كفرتَ بالأرْبَابِ؟ 
قد مزَّقوا جسدى.. وداسُوا أعظـُمى 
ورأيتُ أشلائى على الأبــــــــوابِ 
* * * 


ماعدتُ أعرفُ أيْنَ تهدأ رحلـتـــى 
وبأى أرض ٍ تستريـــح ركـــــَابى 
غابت وجوهٌ.. كيفَ أخفتْ سرَّها ؟ 
هرَبَ السؤالُ.. وعز فيه جوابى 
لو أن طيفـَا عاد بعـــد غيــــابــــه 
لأرى حقيقة رحلتــــــى ومآبـــــى 
لكنه طيفٌ بعيــــــدٌ.. غامـــــضٌ 
يأتى إلينــــــا من وراء حجـــــــابِ 
رحل الربيعُ.. وسافرت أطيــــارُه 
ما عاد يُجدى فى الخريفِ عتــابى 
فى آخر المشوار تبدُو صورتـــى 
وسْط َ الذئاب بمحنتى وعــــــذابى 



ويطل وجهُك خلفَ أمواج ِ الأسى 
شمسًا تـُلـَوِّحُ فى وداع ِ سحــــــابِ 
هذا زمانٌ خاننى فى غفـــــلــــــةٍ 
منى.. وأدْمى بالجحــودِ شبـــــابى 
شيَّعتُ أوهامـــى.. وقلتُ لـَعَلـَّنـى 
يوما أعودُ لحكمــتـى وصـــــــوابى 
كيف ارْتضـــيتُ ضلالَ عَهْدٍ فاجر 
وفسادَ طاغيةٍ.. وغـــــــدرَ كِلابِ؟! 
ما بين أحـــــلام ٍ تـَوارى سحْــرُها 
وبريق ِ عُمر صارَ طيـــفَ سَرَابِ 
شاختْ ليالى العُمر منـــى فجـــــأة ً 
فى زيف حلم ٍ خــادع كـــــــــذابِ 



لم يبق غيرُ الفقر يسْتـُر عَوْرَتـــــى 
والفقرُ ملعونٌ بكـــل كِتــــــــــــــابِ 
سِربُ النخيل ِعلى الشواطئ ينـْحَنى 
وتسيلُ فى فــزع ٍ دِمـــــــاءُ رقاب ِ 
ما كان ظنى أن تكونَ نهايتــــــــــى 
فى آخر المشـــوار ِ دَمْعَ عتــــــابِ! 
ويضيعُ عمرى فى دروبَ مدينتـــى 
ما بين نار القهر ِ.. والإرْهـــــابِ 
ويكون آخرَ ما يُطلُّ على المــــدى 
شعبٌ يُهــــرْولُ فى سوادِ نقـــــابِ 
وطنٌ بعَرض ِالكون ِيبـــــدو لعبـــة ً 
للوارثين العرشَ بالأنســـــــــــابِ 



قـَتـْــــــلاكِ يـــا أمَّ البلادِ تفرقـُــــــوا 
وتشردُوا شِيَعًا على الأبْــــــــــوَابِ 
رَسَمُوكِ حُلما..ثم ماتـوا وَحشـــــة ً 
ما بين ظـُلـْم ِ الأهل ِ.. والأصْحَابِ 
لا تخجلى ِ إن جئتُ بابَكِ عاريـــــًا 
ورأيتِنى شَبَحــــًا بغيــــــر ثيــــــابِ 
يَخْبُو ضياءُ الشمس ِ.. يَصغُر بيننا 
ويصيرُ فى عَيْنى.. كعُودِ ثقـــــــــابِ 
والريحُ تزأرُ.. والنجومُ شحيحـــــة ٌ 
وأنا وراءَ الأفق ِ ضوءُ شهــــــــابِ 
غضبٌ بلون العشق ِ.. سخـط ٌ يائسٌ 
ونزيفُ عمر ٍ.. فى سُطـُور كتـابِ 



رغْمَ انطفاءِ الحُلِم بين عيـــــــــــوننا 
سيعودُ فجرُكِ بعدَ طول غيـــــــابِ 
فـَلـْترحمى ضعْفِى .. وقلـَّة َ حِيلتــى 
هذا عِتابُ الحُبِّ.. للأَحْباب.

2009-10-05T18:38:00.004+03:00

رجع الموسم اياه من جديد مش قصدي موسم المدارس ولا موسم احتفالات أكتوبر انا قصدي موسم حرق قش الرز اللي بقي فصل من فصول السنة في مصر يعني بقي عندنا ربيع وصيف و قش الرز و خريف و شتا ، و لأن طبعا مصر هي الريادة والاصالة والتفرد محدش عنده فصل زياده غيرنا ، وده بفضل مجهودات وزير البيئة (هو اسمه اية؟؟) مش مهم الاسم المهم الانجاز .
لو كنت محظوظ و سافرت في الفترة دي لأي بلد برة مصر بالطيارة ، بص من الشباك الي جنبك هتلاقي السحب البيضاء القطنية تحولت لهباب أسود ومتنيل بستين نيلة و طبعا مش هتشوف النيل والهرم و الاراضي الزراعية اللي انت كنت مستني تتفرج عليهم ، فأحسن لك تقفل الشباك و تحمد ربنا انك خرجت منها علي رجلك وتدعي للي لسه فيها ربنا ينجيهم من الربو و الأمراض الصدرية و السرطان.

و الحمد لله بفضل مجهودات وزير البيئة (مش الوزير الحالي كمان الوزرا السابقين لأن ده انجاز مستمر و طويل المدي) أصبحت نسبة الرصاص في الجو ثلاثة أمثال المعدلات المسموح بها أما تلوث الهواء بصفة عامة فيتراوح بين 7 :10 أمثال المعدلات المسموح بها في المناطق السكنية، وبلاش نتكلم عن الضوضاء والزبالة لأن دي من الكماليات وبعدين خلاص بقت عادة وربنا مايقطع لنا عادة.

2009-09-19T23:58:00.001+03:00

عيد سعيد

رمضان حول العالم

2009-09-06T01:09:00.003+03:00

رمضان في تركيا

رمضان في اندونيسيا

رمضان في الهند

2009-09-06T01:04:00.000+03:00

يا باب يا مقفول ... إمتي الدخول

صبرت ياما و اللي يصبر ينول

دقيت سنين ... و الرد يرجع لي : مين ؟

لو كنت عارف مين أنا كنت أقول

عجبي !!!

صلاح جاهين

2009-08-29T07:12:00.002+03:00

أحيانا يتحول من يدافع عن حقوق البسطاء و الضعفاء إلي أكثر الناس عداء لهم و لا يحدث ذلك بين ليلة وضحاها بل بالتدريج يتحول من الدفاع عن حقوق البسطاء إلي الدفاع عن حقوقة الشخصية ثم الدفاع عمن يحمون مصالحة، تلك الصورة موجودة كثيرا لدي الصحفيين الوصوليين و لا أقول أن الصحفيين جميعهم هكذا ولكنهم بشر يخطئون و يصيبون. و قد رأيت أحدهم بأم عيني يزجر ويهدد و يتوعد عامل بسيط جاء يستنجد بأي شخص يستطيع أن ينقذ ابنه الراقد في المستشفي بين الحياة والموت ،جاء صارخا :"انقذوه لا أريد منكم أي شئ سوى أن تنقذوه لا أستطيع أن استكمل مصاريف علاجه و لا أملك له شيئا سوي الدعاء، ارجوكم انقذوه أنا لا أريد أموالا لا أريد شيئا لنفسي اريده فقط ان يتعالج علي نفقة الدولة اعتبروه فنان أو لاعب كرة ، ارجوكم افعلوا شيئا فبعد 30 عاما من خدمة الحكومة لا استطيع ان افعل له شيئ، فلعل علاجه بين ايديكم ." و رغم كل هذه التوسلات والكلمات الموجعه التي ينفطر لها القلب خرج الصحفي الهمام صارخا من مكتبه " ما كل هذه الضجة لا أستطيع أن أعمل بسبب هذا الصراخ ، اريد بعض الصمت لدي مقاله مهمة اكتبها تدافع عن محدودي الدخل و أنت ايها الرجل الصارخ قطعت حبل أفكاري ،فلتذهب الي الجمعيات الخيرية أو الي وزارة التضامن ولكن لا تزعج ابدا من يحاول الدفاع عن حقوق الضعفاء"!!!!!!!!!!!

2009-08-20T23:09:00.002+03:00

كل عام وانتم بخير

حكماء آخر زمن

2009-08-20T22:33:00.004+03:00

عشان في ناس كتير زهقت من الصراع العربي الاسرائيلي وشافت ان كفاية كدة يا جماعة التمثيلية باخت وبقت مملة تقدموا بحل نهائي للقضية ، الناس دول هما مؤسسة سلام الشرق الأوسط في امريكا التي تفتق ذهنها وعصرت مخها بالخطة السحرية للنهاية الفلسطينية و سموها خطة الحكماء الأربعة و هم:
جيمي كارتر الرئيس الأمريكي السابق.
‬وجيمس بيكر وزير الخارجية الأسبق في‮ ‬ولاية جورج بوش الأب .
و برينت سكوكروفت مستشار الأمن القومي‮ ‬في‮ ‬إدارتي‮ ‬جيرالد فورد وجورج بوش الأب .
وزبيجنيو بريجينسكي‮ ‬مستشار الأمن القومي‮ ‬السابق في‮ ‬إدارة كارتر‮.
و الخطة تتضمن :
دولة فلسطينية منزوعة السلاح

تعويض اللاجئين الفلسطينين ماديا بدلا من حق العودة

تقسيم القدس لعاصمتين

وتعديل حدود 7691

واخيرا العيب مش في اللي اقترحوا الخطة العيب في اللي أكيييييييد هيوافقوا عليها.

حين خلت القاهرة من أتوبيسات الهيئة

2009-08-20T21:39:00.002+03:00

منذ يومين و سائقي و محصلي هيئة النقل العام بدأوا اضراب مفتوح عن العمل ،طبعا كل شوية يطلع مسئول و يقول ان الاعتصام انفض و الموضوع اتحل لكن الحقيقة أن الشوارع خالية من الاتوبيسات الحكومية في أكتر وقت الناس بتحتاج فيه لمواصلات ... انا عن نفسي طوال النهارما شفتش غير اتوبيس واحد كان واخد مشجعي الزمالك علي الاستاد .
لكن برغم المعاناة و الانتظار الطويل أنا مع الاضراب ده لأن سواقين الهيئة بالذات اكتر ناس مظلومين في البلد ،يعني لما يبقي مرتب الواحد فيهم 200 أو 300 جنية يعملو ايه في الغلا ده ، بالرغم أن الوظيفة دي محتاجه تركيز ومجهود بدني وعصبي شديد لأنه مسئول عن أرواح ناس . أنا عارفة ان محدش فيهم بيقرا البلوج بس انا عاوزة اشجعهم واقولهم اثبتوا علي مواقفكم و مطالبكم العادلة ، انتو بس عاوزين تعيشوا حياة كريمة و ما تشيلوش همنا يا جماعة احنا هنتصرف في تاكسي أو ميكروباس ان شاالله حتي نضحي و نركب تاكسي العاصمة .

2009-08-17T18:35:00.004+03:00

عملووها الوحوش ... عملوها الصيادين المصريين...احنا لا بيهمنا قراصنة ولا غيره ...ده احنا اللي دهنا الهوا دوكو...وبعد كل المجهود اللي عملة الجنرال حسن خليل صاحب المركب ممتاز 1 الخارجية المصرية عاوزة تنسب الفضل ليها و لجهودها الغير دبلوماسية - أتمني يكون الكلام ده صحيح -لكن الفضل اولا واخيرا يرجع للجنرال حسن خليل ولخطته العسكرية ضربهم في بعض وخرجوا الحمد لله بسلام وكمان أسروا منهم 7... والله وعملوها الرجالة...

2009-08-13T22:37:00.010+03:00

في عددها الأخير نشرت مجلة التايم الأمريكية علي عادتها موضوع عن القادة الأقل شياكة في العالم ،طبعا موضوع شيق
وبدأت بالترتيب التالي :
1يتصدر المرتبة الأولي كيم جونج ايل رئيس كوريا الشمالية وصاحب التجارب النووية التي تؤرق اوربا وأمريكا علي حد سواء ،دائما يرتدي بدلة سفاري - زي الموظفين بتوعنا- ونظارة سوداء وجزمة عالية شوية ، يمكن لأنة مش بيحب الملابس الأوربية أو كنوع من التقشف .
2في المرتبة الثانية رئيس الوزراء الروسي فلاديمير بوتين علي الرغم من أن ملابسة دائما اوروبيية- يعني بدلة وكرافتة- إلا أنه دخل المجموعة بسبب صور التقتطت له مؤخرا في اجازته عاري الصدر ويرتدي بنطلون باجي وجزمة طويلة .

3الرئيس التشيلي أوجستو بينوشيت ، كان دائما يرتدي بدلة عسكرية بتلمع من النظافة طبعا و بالطو عليها من نفس اللون ،علي فكرة هو مش الرئيس الحالي لكنة مات في 2006 بعد ما وري تشيلي أيام سودة في عهده من الديكتاتورية و الظلم .

4وفي المرتبة الرابعة بلا منازع الرئيس الليبي معمر القذافي ملابسة دائما غريبه مزيج من الملابس البدوية وابتكاراتة الخاصة مش بس لبسة اللي غريب لكن تصرفاته كمان يعني مثلا بعيدا عن السياسة ،في كل زياراته الخارجية يصر ان يقعد في خيمته و يحوط به دائما مجموعة من السيدات كحرس وفي أخر زيارة له لايطاليا كان يضع علي صدرة صورة القائد الليبي عمر المختار.

5رئيس بوليفيا ايفو موراليس ،يرتدي دائما بلوفرات مصنوعة من الصوف المحلي تشجيعا لصناعات بلاده ومن كتر ارتداءه لهذا النوع الخاص من البلوفرات اليدوية الصنع قام أحد رجال الأعمال في بلاده بتصنيع هذا النوع من الملابس واسماه ايفو علي اسم الرئيس.

6 احمدي نجاد رئيس ايران مع اني شايفة ان لبسه عادي مش مختلف في حاجة غير انه مش بيلبس كرافته زي كل الايرانين لأنها غير اسلامية ورمز للحضارة الغربية .

7 فيدل كاسترو رئيس كوبا السابق ،كان يرتدي دائما بدلته العسكرية لكن بعد مرضة وتنازله عن االسلطة لأخوه بدأيرتدي ملابس رياضية خاصة ماركة اديداس الألمانية وظهر بهذة الهيئة في كذا صورة ليطمئن شعبه علي حالته الصحية .

8هوجو شافيز رئيس فنزويلا ،دائما يرتدي اللون الأحمر في اشارة واضحة علي اليسارية.

9ماو تسي تونج الزعيم الصيني اليساري المعروف، اشتهر عنه ارتدائه نوع معين من البدل زي السفاري كدة- واضح ان البدل دي محبوبة في آسيا- ومن بعده اتبعه مريدوه بارتداء نفس البدلة الشهيرة.

10جان بيدل بوكاسا امبراطور افريقيا الوسطي كان يرتدي ملابس غريبة جدا أشبة بملابس القرن 18 وكان سبب ذلك اعجابة بنابليون بونابرت وعشان كده كان بيلبس زيه.

2009-06-25T20:03:00.001+03:00

اصدرت محكمة جنوب القاهرة الخميس الحكم باعدام رجل الاعمال المصري القيادي في الحزب الوطني الحاكم هشام طلعت مصطفى والضابط السابق محسن السكري في قضية مقتل المغنية اللبنانية سوزان تميم وذلك بعد موافقة مفتي الديار المصرية على العقوبة.

يحيا العدل

2009-06-25T19:40:00.002+03:00

انفلونزا الطيور و بعدين انفلونزا الخنازير و الطاعون ... مصادفة عجيبة ان كل الأمراض دي أو بمعني أصح الأوبئة دي تظهر في وقت واحد محدش واخد باله ان في حاجة اسمها الحرب البيولوجية ...محدش متخيل ان معامل الجيش الأمريكي ممكن يتسرب منها فيروسات معينة ...محدش فاكر االسارس اللي كان بيصيب الأسيوين فقط دونا عن جميع خلق الله ولما ظهرت عدة اصابات بين الأوربيين اختفي وماعدش له وجود ...محدش واخد باله ان المعامل العسكرية الليبية فيها فيروسات فتاكة ومفيهاش حراسة ولا أمن كفاية ....مفيش حد خالص طاب خلاص ولا كأني قلت حاجة ...ربنا يديم عليكو الصحة.

2009-06-25T19:10:00.003+03:00

الفن مرآة المجتمع ... كلام كبير شوية بس جميل ... يعني لما يكون فيه فيلم يبرز أسوأ ما في المجتمع من قتل و دبح و سرقة و اغتصاب و شذوذ وانعدام ضمير وظلم... الخ و يسافر الفيلم ده في مهرجان دولي كل الأجانب اللي هيتفرجوا عليه هيفتكروا ان مصر كده مفيهاش أي حاجة عدلة و العكس لو فيلم بيقدم قصة حب وتضحبة و اخلاص و صداقة وكل القيم الحلوة علي خلفية من الحدائق الغناء والشوارع النضيفة هيفتكروا ان مصر مفيهاش أي حاجة وحشة و هيحبوها وهيحاولوا يزورها و يتعرفوا عليها صحيح هيتصدموا لكن علي الأقل هيبصوا علينا من منظور ايجابي ... هي دي أهمية سلاح السينما في الخارج...و هو ده بالضبط الي حصل معايا لما اتفرجت علي مسلسل باب الحارة ،حد سمع عنة قبل كده مش مهم أنا هاحكي لكم عليه، ده مسلسل سوري بيتعرض علي النيل للدراما بيحكي قصة حارة سورية زمان شوية متهيألي في أوائل القرن اللي فات و بيعرض حياة أشخاص طبيعين مش ملايكة ولا شياطين مجرد ناس عادية بتحب وتكرة وتغلط و تصيب وتفرح وتحزن يعني قصة مفيهاش اي تعقيدات مجرد نماذج بشرية لكن شدتني و خلتني أتابعها من بدايتها لحد دلوقتي و ألغي أي مواعيد أو مشاوير في وقتها عشان ماتفوتنيش حلقة ، علي فكرة أنا مكنش أي مسلسل يشدني أتابعة للنهاية من أول حلقة باعرف هيخلص علي ايه ،ومن شدة حبي للمسلسل بقي نفسي اقابل واحد سوري زي ابو عصام ولا ابوشهاب و احبة و اتجوزه ، محدش يضحك ، صحيح أنا عارفة ان الشباب السوري بقوا زي الشباب المصري باضبط فرافير بس معلش أحلام هبلة بقي

نظافة أوباما

2009-06-04T20:57:00.003+03:00

بعيدا عن زيارة أوباما و خطابه وال 15 مليون جنيه اللي اتصرفوا علي النظافة والتوضيبات ، نفسي حد يفهمني مادام احنا قادرين ان بلدنا تكون نضيفة كده و في احلي شكل ليه مش بنعمل كده علطول استخسار ولا كسل ولا قلة امكانيات هو يعني لازم أوباما يجي ،ده حتي يبقي تدخل في شأن داخلي ،أنا نفسي أوباما يجي كل شهر مرة و كل مرة في حته شكل مرة في رمسيس مرة في الطالبية ومرة في عزبة الهجانة و في ظرف سنة واحدة مصر هتبقي أحلي من باريس. أو بلاش نتعبه معانا الراجل وراه مشغوليات برضة ،احنا خلاص عرفنا كلمه السر اي حد عنده مشكلة نضافه في منطقته يروح لبتوع النظافة ويهمس في ودنهم بس " أوباما جاي" هتلاقي كل واحد منهم جري زي المسحور علي شغلة وحتتك بقت زي الفل بس أوعي تنسي كلمة السر" أوباما جاي"

2009-05-14T21:45:00.006+03:00

هي الدنيا جري فيها ايه ؟ ايه كمية جرائم القتل دي؟ القتل والدم بقي أسهل حل لكل المشاكل ، والعنف و البلطجه بقي شيء طبيعي في الشارع، احنا بقينا فعلا عايشين في غابة ناقص ايه بعد كده خلاص الأب بقي يدبح أولاده بدم بارد و الأولاد يدبحوا ابوهم بمساعدة الأم و قتل الأطفال بقي شيء عادي خالص، يمكن لأن مكافحة الارهاب كان علي حساب مكافحة الجنايات أو لأن كل الناس تري أن القانون للغلابة بس والحرامية الكبار محدش بيحاسبهم مهما عملوا (زي ممدوح اسماعيل مثلا) وكل واحد حر ياخد حقه بدراعة ، ولا لأن سعر المخدرات بقت في متناول يد الجميع و تموت أجدعها ضمير عشان عملية قتل أو اغتصاب . كل ده خلي الناس متحفزة و خايفة من بعض كل واحد متخذ موقف عدائي من الآخر حتي قبل أن يتعرف عليه و أنا كنت واحدة من بين الناس دي خايفة علي نفسي و علي أسرتي و علي كل حبايبي و متحفزة لكل حركة أو كلمة ممن لا أثق فيهم او لا أعرفهم جيدا كانت تلك حالتي طوال هذا الأسبوع حتي مساء أمس حدث شيئ جعلني أراجع كل أفكاري و مخاوفي ففي كل ليلة كعادتي أستمع للراديو معشوقي الأول والأخير كا ن يذيع برنامج ليلي أسمه سمار الليل وكان يدور الحديث بين مذيعته وبين شخص يدعي رضا سكر مسئول كبير في بنك الطعام و طبعا الحديث كلة كان عن بنك الطعام وخطته لانهاء الجوع في مصر عام 2025يعني محددش هيبات من غيرعشا أنا كنت فاكرة بنك الطعام ده بيوزع وجبات علي الناس الفقرا مرة كل سنة كده أو في رمضان وخلاص لكن الموضوع طلع أكبر من كده طلع انهم بيتكفلوا بالأسر لمدد طويله يعني كل شهر يوصلو لهم كرتونة بكل مستلزماتهم رز و سكر وسمن و شاي و مكرونة بكميات حسب كل أسرة ، الشيء اللي يفرح بجد انهم قضوا علي الجوع في 70 قرية من أفقر قري مصر بمساعدة رجال الأعمال والتبرعات الكبيرة يعني رجل أعمال واحد لكل قرية يتكفل بيها لمدة عام وبعدها يجي غيرة وهكذا يعني فية 70 رجل أعمال بيأكلوا 70 قرية كل سنة بس مش بعلنوا عن نفسهم. مش كده وبس لأ كمان بنك الطعام له استثمارات ومصانع خاصة بيه عشان يصرف بيها علي مشروعاته الخدمية و كل مشروع منهم له مجلس ادارة وأقسام وناس بتشتغل بجد لوجه الله بدون أي مقابل كل ده غيرتجميع الأكل الفائض (الفائض مش الفضلات) من المطاعم والفنادق بعد الحفلات الكبيرة والأفراح وتوزيعها .يمكن أكون باعملهم دعاية بس حقيقي يستاهلو احلي دعاية. مصر هتفضل طول عمرها عامرها بأولادها وبناتها مش بحد تاني .

علي فكرة هما محتاجين متطوعين لأنهم بدأوا من دلوقتي يجهزوا لرمضان .

هو احنا عنصريين؟

2009-04-23T22:02:00.007+03:00

العنصرية ،كلمة واحدة بهدلت أمريكا و جابت عاليها واطيها بدأت بالعنصرية ضد الهنود الحمر أو السكان الأصليين ثم العنصرية ضد الأفارقة الذين كانوا في بلادهم أسياد ونقلوهم قهرا إلي أمريكا عبيدا و بدأ التمييز يقل شيئا فشيئا مع ظهور حركة الحقوق المدنية الأمريكية بقيادة مارتن لوثر كينج في الستينات حتي انتهت تقريبا و أصبح اوباما رئيسا .
وسياسة الفصل العنصري كذلك في جنوب أفريقيا كانت لها آثار سيئة لفترة طويلة ابتداء من عام 1948 حتي عام 1994 ...فترة طويلة طبعا من الظلم والذل.

أما في مصر الحمد لله مفيش العنصرية القاتلة دي لكن ممكن نقول فيه تمييز أو نسبة من التمييز لأصحاب البشرة السمراء،مش شرط يكونوا نوبيين أو صعايدة ، فيه ناس فلاحين لكن بشرتهم سمراء زي أحمد زكي مثلا ،من الزقازيق.
التمييز ده ممكن يبدأ كالعادة من السينما والتلفزيون اللي دايما الناس بتتأثر بيه و تقلده يعني مثلا أي واحد أسمر يبقي بواب أو خدام ،فعلا النوبيين كانوا دايما يشتغلوا الأشغال دي لكن مفيش واحد موظف أو مدرس أو حتي عاطل ،أي واحد اسمر يجي في الكادر أعرف علطول ان التريقة هتبدأ علي لونة بهدف انتزاع الضحكات ،مع اني اعتقد ان ده شيئ مش مضحك ابدا انك تجيب واحد كومبارس غلبان وتقعد تتريق عليه عشان لونه ،ايه الشوكولاتة ده؟ ،هو انت اتحرقت في الفرن؟ ،ده شبه البتينجان الأسود ، مال الليل دخل بدري كده ليه ...الخ. أعتقد أن أحسن واحدة كانت ضد الاستهزاء ده هي د.مني أبو النصر مخرجة مسلسل الأطفال بكار وصاحبة فكرته ،لأنها خلت الطفل النوبي زيه زي أي طفل مصري مع اختلاف بسيط في العادات والتقاليد.
كل ذلك التمييز ممكن يبقي بنية حسنة بغرض الضحك أو الهزار لكنه أكيد بيضايق اللي بنضحك عليه مع ان رسولنا الكريم دايما أكد أن الناس سواسية كأسنان المشط وأنه لا فضل لعربي علي أعجمي إلا بالتقوي وكذلك في القرآن الكريم في سورة الحجرات -آية 11

( يا ايها الذين امنوا لا يسخر قوم من قوم عسى ان يكونوا خيرا منهم ولا نساء من نساء عسى ان يكن خيرا منهن ولا تلمزوا انفسكم ولا تنابزوا بالالقاب بئس الاسم الفسوق بعد الايمان ومن لم يتب فاولئك هم الظالمون)

يعني الموضوع مش صغير ده مذكور في السنة وفي القرآن و واضح بدون أي لبس ، المفروض هو ده يبقي سلوكنا في كل مكان و كل وقت مش يبقي النص موجود عندنا والتطبيق موجود في أمريكا و أوربا ، صحيح التمييز لا يمكن يختفي من علي وجه الأرض ، لكن أي واحد هناك يخاف أن يوصم بالتفرقة العنصرية.علي الأقل لازم نحاول أن المصريين كلهم يعاملوا بمساواة ،لأن كلهم مصريين مفيش تفرقة بينهم علي أساس اللون أو الدين أو الجنس.

أنا بكره البطاله

2009-03-01T00:27:00.004+03:00

زهقاااااااااااااااااااااانة و طهقانة وقرفانة و السبب البطالة(حلوة دي تنفع مطلع أغنية لشعبولا)سبعتاشر سنة من عمري ضاعوا في المدارس والجامعات و المذاكرة والكتب والمحاضرات و الملازم والامتحانات والمراجعات والدروس اللي فلست اللي جابوني و في الأخر قعدت جنب أمي أقشر بطاطس و أحمر اللحمة وأعمل السلطة ،طب ده أنا لو أعرف ان أخرتها كده مكنتش اتكفيت طول عمري علي الكتب والمذاكرة (أصل أنا كنت دحيحة بعيد عنكم) وكنت عشت أحلاها فترة مراهقة في فسح و خروجات وأروش نفسي بقي، ماهي الحكاية مش جايبه همها.
أنا حاسه دلوقتي أن دماغي بتغلي و لو قست الضغط ممكن الجهاز يطق يفرقع في وشي ،كل ده عشان عاوزة أشتغل في تخصصي ،اللي درسته في الكلية واللي قربت أنساه ،لكن ازاي لازم الواحد يطلع عين اللي جابوه قبل مايترستأ في شغلانة تستر عليه قبل الفضايح .اللي عاوز خبرة عشر سنين واللي يقوللي الحجاب اللي علي راسك ده ما ينفعش تشليه ،جوه الشغل بس ابقي البسيه بره زي ما انتي عاوزة ،بالذمة ده كلام ناس عاقلين .لأ ومش ناقص كمان غير الأزمة المالية اللي هتخلص علينا (اقصد الشعب الحبيب المسالم)لأن الناس التانية مش هتفرق معاهم تلاتة أربعة مليار خسارة، لكن في الأخر برضة أنا واثقة ان الحكومة هتوفر فرص عمل للشباب العاطل مش علشان دي مسئوليها لأ لأن ببساطة الايد البطالة نجسة ،حد يبص كده مره علي الوظايف بتاعة اعلانات الحكومة اللي بتتباهي بيها في الجرايد هتلاقي مطلوب نجار مسلح ،مطلوب خياطة ،مطلوب كهربائي .أنا مش بأقول ان الناس دي ماتشتغلش بس برضة فين مطلوب مهندس ،مطلوب طبيب ،مطلوب محامي ،الناس دي هما اللي بيطلع عنهم علي مايلاقوا شغلانة محترمة ،كريمة ،و ربنا يبارك لنا في الحكومة النظيفة الطويلة.

اسرائيل في قلب هوليوود

2009-02-27T19:32:00.028+03:00

أثناء حرب اسرائيل المدمرة علي غزة ظهرت دعوات لمقاطعة الشركات التي تدعم اسرائيل وتدعم حربها علي أطفال غزة و اصبحت قوائم تلك الشركات منتشرة علي صفحات الفيس بوك وتوزع علي طلاب المدارس والجامعات وحتي العمال والموظفين في الشركات والمصانع ،
و من باب أولي مقاطعة الأشياء الغير الضرورية التي لن يؤذي نقصها لشئ مضر مثل الأفلام السينمائية وشركات الانتاج التي تدعم اسرائيل ليس ماديا فقط ولكن معنويا و ثقافيا أيضا وكذلك نجوم السينما الذين ملؤوا الدنيا بأخبارهم وحكايات غرامهم وزواجهم و أولادهم ،فهؤلاء من السهل مقاطعتهم بدلا من أن ندعمهم بملايين يصرفونها علي قتل أطفال غزة والضفة،و هؤلاء النجوم من السهل معرفتهم وتميزهم عن غيرهم من خلال تصريحاتهم و تصرفاتهم و منهم:

توم كروز

ببساطة لأنه صرح أثناء الحرب أن العرب هم مصدر الأرهاب في العالم فهم يهاجمون الجميع بلا استثناء و أتمني أن تقضي اسرائيل عليهم تماما.

هاريسون فورد

و هو صاحب سلسلة الأفلام الشهيرة " انديانا جونز" و هو يهودي الأصل وقال في تعليقه عن الحرب في غزة بأن العرب مخلوقات أشبه بالحيوانات واليهود شعب الله المختار فليس ثمة مقارنة.

كيانو ريفز

بطل أفلام الماتريكس الشهيرة الذي صرح قائلا:"لو كان العرب أقوياء بما يكفي لشملت سيطرتهم العالم كله وبما أنهم ضعفاء فينبغي أن ندمرهم تماما."

ريتشارد جير

و قد قال أن العرب هم شر هذا العالم ويجب ابادتهم

بن ستيلر

و هو يهودي و غالبا اسرائيلي الجنسية و قد صمم مع شركة انتاج فيلم مدغشقر علي عمل عرض خاص للفيلم في اسرائيل لكي يرفه عن شعب اسرائيل.

أدم ساندلر

و هو يهودي متعصب لاسرائيل و خير مثال علي عنصريته هو فيلمه "لا تعبث مع زوهان" الذي يحاول فيه أن يسفه الصراع العربي الاسرائيلي و يظهر جيش اسرائيل علي أنه الجيش الذي لا يقهر خاصة بعد فشل الجيش في حرب لبنان .

ده غير مادونا ولاري كينج و الأخوان كوهين و غيرهم كتير ممن يشكلوا رأي ووعي العالم عن طريق أفلام هوليوود.

2009-01-26T16:55:00.006+03:00

يا تلاميذ غزة علمونا بعض ما عندكم فنحن نسينا

علمونا بأن نكون رجالا فلدينا الرجال صاروا عجينا

علمونا كيف الحجارة تغدو بين أيدي الأطفال ماسا ثمينا

كيف تغدودراجة الطفل لغما

وشريط الحرير يغدو كمينا

كيف مصاصة الحليب إذا ما اعتقلوها تحولت سكينا

يا تلاميذ غزة

لا تبالوابإذاعاتنا

ولا تسمعونا

اضربوا

بكل قواكم

واحزموا أمركم

ولا تسألونا

نحن أهل الحساب والجمع والطرح

فخوضوا حروبكم واتركونا

إننا الهاربون من خدمة الجيش

فهاتوا حبالكم واشنقونا

نحن موتى لا يملكون ضريحا

ويتامى لا يملكون عيونا

قد لزمنا جحورنا

وطلبنا منكم أن تقاتلوا التنينا

قد صغرنا أمامكم ألف قرن خلال شهر قرونا

يا تلاميذ غزة لا تعودوا لكتاباتنا

ولا تقرأونا

نحن آباؤكم فلا تشبهونا

نتعاطى القات السياسي والقمع

ونبني مقابرا وسجونا

حررونا من عقدة الخوف فينا

واطردوامن رؤوسنا الافيونا

علمونا فن التشبث بالأرض

ولا تتركواالمسيح حزينا

يا أحباءنا الصغارسلاما

جعل الله يومكم ياسمينا

من شقوق الأرض الخراب طلعتم

وزرعتم جراحنانسرينا

هذه ثورة الدفاتروالحبر

فكونوا على الشفاه لحونا

أمطرونا بطولة وشموخا

إن هذا العصر اليهودي وهم

سوف ينهارلو ملكنا اليقينا

يا مجانين غزة

ألف أهلا بالمجانين إن هم حرونا

إن عصر العقل السياسي ولى من زمان

فعلمونا الجنونا

نزار قباني

2009-01-11T02:10:00.004+03:00

كان ذلك اليوم تحديدا هو أهم يوم في حياتها فهو اليوم الذي رزقت فيه بابنتها الوحيدة التي أنارت الدنيا منذ أتت لهذا العالم واليوم ستتم عامها السادس ولذلك قررت أن تتوجه بعد عملها إلي أحد محال الحلويات القريبة من المنزل لتشتري لها أحلي تورتة أو دستة جاتوة وشوية حلويات بعد ذلك توجهت سريعا نحو المنزل وهي تكاد تجري من فرط لهقتها لرؤية وجه الصغيرة عندما تفاجأ بكل تلك الأشياء ، وعندما فتحت الباب ودلفت إلي المنزل لم تهرع اليها كعادتها بل وجدتها متسمرة امام التلفاز بجانب أبيها فدخلت اليهما حاملة معها كل هداياها ثم قالت:"شفتي يا دينا يا حبيبتي جبتلك معايا ايه ؟!! كل الحاجات الحلوة اللي انتي بتحبيها جبتلك تورته كبيرة أوي بلاك فورست وساليزون و دنش وحاجات تانيه !!"

كل ذلك لم ترد عليه دينا سوي بكلمة واحدة هي : "اوكي يا ماما !!" وامام تعجب الأم من تصرف ابنتها قالت لها: "النهاردة عيد ميلادك يا حبيبتي ،كل سنة وانتي طيبة ، انتي نسيتي ولا ايه أنا مش قلت لك الصبح"
-" ايوه ياماما ،صح أنا فاكرة مانسيتش ، عارفة يا ماما أنا شفت ايه في التلفزيون دلوقتي؟!"
-" شفتي اي يا حبيبتي كارتون تاني"
- " لأ ، أنا شفت الأطفال اللي اسرائيل ضربتهم بالقنابل ، شفتهم ميتين، أطفال أدي كدة واطفال أصغر مني بشوية و أطفال صغيرين خالص ياماما ،كانوا ميتين ومامتهم كمان ميتين ، وشفت واحد بيحط أولاده في التربة بتاعة الميتين و أولاده صغيرين أوي يا ماما، أنا أول مرة أشوف ميتين ، أنا كنت فاكراهم بيبقي شكلهم وحش طلعوا عاديين ،زي ما يكونوا نايمين ...صح يا ماما؟!!"
-"صح يا حبيبتي...امم ...مش هتقومي تاكلي الحاجات الحلوة دي"
-حاجات حلوه... طيب ...عارفه بابا قالي ان الأطفال دي ماكانش عندهم عيش ياكلوه قبل ما يموتوا ...بصي أنا مش هاكل الحاجات دي ابدا خديهم انتي وبابا و ابعتوهم عند الناس دي " امام كل ماتنطقه هذه الفتاه الصغيرة من كلمات لم تجد امها ما تقوله فنظرت إلي زوجها الذي قال لابنته:"حاضر يا حبيبتي ...بكره الصبح هاخدك و نروح نقابة الأطباء ونتبرع بفلوس لأهالي غزه وربنا معاهم يثبتهم ويحميهم".

القصة دي مش من وحي خيالي دي قصة حقيقيه حصلت قدامي مع اختلاف الأسماء .

2009-01-09T01:36:00.002+03:00

Are you deaf ,dump and blind can't you see,or can't you understand they are killing our children if you didn't know before well..here is recent pictures

Now you know what are you going to do.This is a message for anyone who could do something please DO SOMETHING

2009-01-01T15:50:00.001+03:00

يا تري أخرتها ايه؟!!!

2008-12-28T00:36:00.003+03:00

كلام كتير عايزة أقوله ما يتقالش :

غزة ... مجزرة...دمار...تواطؤ ...خيانة...تخاذل

يمكن الكلمتين دول يكونوا كفاية

2008-12-22T18:38:00.003+03:00

اخترعت من فترة مقياس جديد لمعرفة غلاوة الناس عندي وهو الموت : ببساطة كدة بسأل نفسي لو فلانة أو فلان حصل له حاجة أنا ايه اللي هيحصل لي ، في ناس لو ماتوا أنا كمان أموت ومش عارفة ممكن أعيش ازاي من غيرهم وفي ناس هازعل عليهم جدا لكن بعد شوية الحياة هتستمر و في ناس هازعل عليهم بس مش قوي و في ناس مش بيفرق وجودهم من عدمة لكن اكتشفت ان المقياس ده فاشل لأن في ناس وجودهم مش بيأثر فينا زي وفاتهم ،ناس مش ممكن تفكر فيهم أو يجوا علي بالك لكن موتهم بيهزك من جوه كأن كان فيه بينكم عشرة عمر، ده اللي حصلي بالضبط لما سمعت خبر وفاه أحد زملائنا في الكلية، كان معانا في نفس الدفعة و نفس السيكشن ، كان هادي جدا ما تسمعش له صوت و في نفس الوقت لما بيتكلم تلاقي دمه خفيف، دايما موجود رغم هدوئه الا أن حضورة كان مميز ، وانتهت سنين الدراسة و كل واحد اخد شهادته في ايده و روح وانقطعت الاتصالات الا مع القليل و فجأه يبلغوني انه مات .....ازاي ....اكيد في حادثة......ابدا والدته بتصحيه من النوم ما قامش...بالبساطه دي الانسان بيموت ...المسأله ملهقاش أي علاقة بسن او حاله صحية ده شاب لسه متخرج يعني عنده حوالي واحد وعشرين سنة و مسمعناش انه اشتكي من اي مرض عضال ...لكن عمرة انتهي. المسألة دي اربكتنا جميعا لأنها فتحت عينينا علي الحقيقة الي دايما بنهرب منها الموت جاي جاي ممكن دلوقتي حالا أو بعد ميت سنة لكنه جاي لا محاله واحنا قريبين منه مش بعيد زي ما احنا متخيلين مجرد نفس يخرج و ما يدخلش أو العكس ومش لأننا لسه صغيرين يبقي بعيد عننا ده يمكن يكون قريب قوي لكن احنا مش شايفين او عاملين نفسنا مش شايفين.................................... ياريت تقروا له الفاتحه

2008-12-15T21:09:00.002+03:00

للأسف ما جاتش فيه

2008-11-30T19:45:00.001+03:00

أنا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي

صلاح جاهين

2008-10-22T21:37:00.003+03:00

البنت دي لازم يتعملها تمثال ......يمكن تكون ما اخترعتش حاجة جديدة أو ساهمت في دفع عجلة السلام بالمنطقة لكنها أول واحدة تقول لأ مش هاسكت ...كفاية سكوت ببساطة لأن سكوتنا هو سبب اللي احنا فيه ....ظاهرة الذئاب الجائعة أو التحرش الجماعي اللي بقي عيني عينك ومحدش من الضحايا اتكلم لأنهم خايفين من الفضيحة حتي ضحايا الاغتصاب بتخاف تتكلم مع إن ما بقاش لهم حاجة يتبكي عليها ....لكنها ببساطة رفضت السكوت يمكن لأنها اتربت علي كدة، علي انها ما تسيبش حقها . أنا باتكلم عن أول صاحبة قضية للتحرش الجنسي اتحكم فيها علي المتهم و هو سائق نقل بثلاث سنين سجن مشدد يمكن تكون فتحت الباب عشان كل اللي زي حلاتها -و هن كتير أوي- يتكلموا و يلعنوا الصمت و يواجهوا الدنيا بدل ما يدفنوا راسهم في الرمل.

رمضانكم كريم

2008-08-29T13:04:00.002+03:00

2008-08-20T11:56:00.003+03:00

ثارت أقاويل كتيرة حول تلفزيون الشرق الأوسط ( اللي هو mbc و العربيه ) فقد قيل أنه يروج للفكر والثقافة الأمريكية ، ونمط الحياة الأمريكي الاستهلاكي و أنا قرأت دراسة تؤكد ذلك، كل ده علي الرغم أن مالكها سعودي . كل ده ممكن نعديه لأن في حاجات كتير حوالنا باشراف أمريكي حتي لو كان أصحابها ومديروها عرب و تخدم المصالح الأمريكية قبل أن تخدم المصالح العربية ، لكن انها تروج للتطبيع مع اسرائيل بعرض أفلام ومسلسلات أمريكية فيها نمط الحياة الاسرائيلي . مثلا عرض أمس في mbc action فيلم أمريكي مش فاكره اسمه كل أحداثة تدور في اسرائيل، حتي ان الفيلم مش عبقري ومحصلش أو واخد 22 أوسكار عشان يضطروا يعرضوه بحيث لا يحرموا العرب من جمالة بل علي العكس مستواه متوسط ويمكن تحت المتوسط كمان ، تدور فكرته حول مساعد الشيطان اللي خرج من سجنه اللي سجنه فيه ريتشارد قلب الأسد أثناء الحروب الصليبية في القدس وبيحاول الراجل الوحش ده يجمع قطع صولجان اللي هيخلي الأرض تقوم فيها المعركة الأخيرة بين الخير والشر لكن شرطيين من شيكاغو هما اللي يتصدوا له وشوية حبشتكانات بقي من بتاعة الأفلام الأمريكية المعروفة ، وطبعا الشرطيين هما اللي بيتغلبوا علي الشر والبطل يتجوز البطلة وتوته توته خلصت الحدوتة.
والحكاية دي مش أول مرة تحصل لكن قبل كده قناه mbc4 عرضت في احد مسلسلاتها الكوميدية الأمريكية(sitcom )حفلة تعميد يهودية طوال الحلقة.
واحنا اللي لما بدأت قناة الجزيرة تستضيف شخصيات اسرائيلية في تحليلها للأحداث قلنا القيامة قامت يا جدعان، لكن mbcبتشتغل علي الهادي والرايق و أنت قاعد تتفرج تلاقي شخصية اسرائيلية في الفيلم و بعدين تلاقي الفيلم بطولة واحد اسرائيلي أو حتي يهودي وبعد كدة تلاقي نفسك بتتفرج علي أفلام اسرائيليه من زمان وانت مش واخد بالك ويبقي الموضوع منتهي ومش هتفرق معاك بعد ما كانت الأفلام الامريكية تروج للبطل الامريكي طيب القلب الوسيم المتسامح اللي بينقذ الكون كله من الهلاك أصبح هناك اتجاه جديد علي شاشات تلفزيون الشرق الأوسط ولعل أبلغ مثل علي ذلك هو القناة الجديدة للأفلام الأمريكية المصحوبة بالترجمة الفارسية التابعة لنفس المجموعة وأظن هدفها واضح .
طبعا كثير من الشباب العربي يحب مشاهدة الأفلام الأمريكية بسبب التقنيات العاليه والحرفية اللي مش موجودة في أفلامنا لكن بما ان ثقافتهم مختلفة عن ثقافتنا هتلاقي في الأفلام دي أحداث و كلام كتير عندهم عادي لكن عندنا يعتبر قلة أدب وشوية شوية هتلاقي نفسك معتاد علي الكلام ده والحركات دي وبترددها و بتلبس زي البطل الفلاني وتسرح شعرك علي طريقة البطل العلاني و شوية شوية هنلاقي بعض كلنا أمريكان بنأكل ماكدونالدز وبنقول shit و أمريكا بدل ماهي في قارة واحدة تبقي في خمس قارات وهي دي بقي العولمة.

بلوجي الحبيب

2008-08-13T13:55:00.005+03:00

من حوالي سنتين أو أكثر لما عرفت أكتر عن موضوع البلوجات و التأثير اللي عملته في حياتنا كنت متحمسة جدا أني اعمل بلوج وأكتب فيه كل اللي بيبسطني أو بيضايقني أو حتي أي كلام فارغ وكنت تقريبا معظم الوقت علي الكمبيوتر باكتب مواضيع وأنسق أشكال ، تقريبا كانت موضة و بتعملي ايه؟ باكتب حاجة في البلوج  أو بادور علي صورة أحطها في البلوج وكل جملة أقولها لأي حد لازم أحشر في وسطها كلمة " البلوج بتاعي " قال يعني جرنان الأهرام ، لكن دلوقتي فقدت فرحتي بالبلوج وما بقاش لية نفس حتي أبص عليه وفكرت حتي أني أمسحة ومحدش هيحس هما يعني كام واحد بيقروه لكن رجعت في كلامي وقلت ان ده حاجة مهمة في حياتي ومرحلة معينة ولازم أحتفظ بيها برغم اني ما بقاش في حاجة في دماغي عشان اكتب عنها مع ان الأحداث كتير جدا ومتسارعة لكن مفيش نفس . وبرغم كدة برضة فضلت أقرا بلوجات معينة باحبها وأقدرها  وعلي راسهم "عايزة أتجوز" و"بنت مصرية" و "سوسة المفروسة" و" علا من غزة". لكن يمكن قدام شويةارجع اكتب تاني بنفس الحماس اللي كان في الأول، حسب المزاج.

محمود درويش.......وداعا

2008-08-13T01:39:00.001+03:00

أحنّ إلى خبز أمي

و قهوة أمي

و لمسة أمي

و تكبر في الطفولة

يوما على صدر يوم

و أعشق عمري لأني

إذا متّ،

أخجل من دمع أمي!

خذيني ،إذا عدت يوما

وشاحا لهدبك

و غطّي عظامي بعشب

تعمّد من طهر كعبك

و شدّي وثاقي..

بخصلة شعر

بخيط يلوّح في ذيل ثوبك..

عساي أصير إلها

إلها أصير..

إذا ما لمست قرارة قلبك!

ضعيني، إذا ما رجعت

وقودا بتنور نارك..

وحبل غسيل على سطح دارك

لأني فقدت الوقوف

بدون صلاة نهارك

هرمت ،فردّي نجوم الطفولة

حتى أشارك

صغار العصافير

درب الرجوع..

لعشّ انتظارك!

من رباعيات جاهين

2008-07-13T18:42:00.001+03:00

حاسب من الاحزان و حاسب لها
حاسب على رقابيك من حبلها
راح تنتهي ولابد راح تنتهي
مش انتهت احزان من قبلها؟
وعجبي

2008-02-28T22:08:00.003+03:00

ماتت دلوقتي حالا ،اتقتلت ،هي فتاة مصرية اسمها سماح عايشة في كرم أبو مصلح علي الحدود المصرية الاسرائيلية،اتقتلت برصاصة طايشة من القوات الاسرائيلية الحدودية ،يمكن يكونوا شوية عساكر كانوا بلعبوا نشان، خلاص بعد ما كانوا بيضربوا العساكر وحرس الحدود بقوا دلوقتي بيضربوا المدنين من غير ذنب ،و من امتي كان ليهم ذنب ،وطبعا لا تنتظروا أي اعتذارات، ولا أي ردود أفعال ،ومحدش هايفكر في الموضوع كتير ولا كأن أي حاجة حصلت ، الظاهر اننا ما لناش أي قيمة ،طب عند أعدائنا ماشي إنما عند أهلنا ،
ولسة ياما هتهون يا مصري ما دمت مصري .

زحمة يا دنيا زحمة

2008-02-28T21:47:00.003+03:00

كان في صورة معينة دايما لما يتكلموا عن الصين بيجبوها في التلفزيون هي صورة الزحمة والناس الكتير اللي كلهم راكبين عجل و ماشين ورا بعض في تنظيم وهدوء رغم الزحمة الشديدة وصورة الناس اللي بتركب المترو أو واقفين علي المحطة مستنينه ،الصورة دي دلوقتي أصبحت في متناول جميع المصريين في أي وقت مش زي زمان وقت الذروة بس، لأي سبب بسيط تلاقي الشوارع كلها واقفة علي رجل حتي لو كان عيد الفالنتين وأنا متأكدة ان كتير من المصريين مايعرفوش الفالنتين دة بيبيع إية ،حتي المترو اللي كان وسيلة سهلة ومريحة بقي وسيلة عذاب وشقاء لأنك مش هتعرف تنزل في المحطة اللي انت عاوزها بسسب التدافع كان غيرك أشطر ،والزحمة دي بدأت تقريبا مع رمضان اللي فات ومن ساعتها والبلد حالها اتشقلب وكأن أهل القاهرة كلهم مش طايقين يقعدوا في بيوتهم ،عشان كدة أنا قررت أبقي مبادرة وأقعد في بيتنا كام يوم يمكن الزحمة تخف شوية.

يستحقوا النشر

2008-02-19T13:30:00.005+03:00

بقالي كتير جدا ما كتبتش حاجة هنا، تقريبا حوالي شهرين ،كنت باتحجج بالإمتحانات وبحث التخرج -اللي لسة ماحتطش فيه قلم وربنا يستر عليا السنة دي-لكني في الحقيقة كنت زهقت من التدوين وتقريبا مش لاقية حاجة أكتبها وقلت لنفسي خلاص مفيش فايدة انتي اللي عندك خلص وكفاية بقي علي كدة ونفض المولد دة لكني في الوقت نفسه كنت متابعة كتير من المدونات الي محطوتين في ال favorites واللي باعتبرهم أصدقائي الحقيقين أو الخيالين يمكن حتي من غير ماهم يعرفوا لأني مش باعلق كتير واحب أكون قارئة في صمت ،ولما عرفت ان دار الشروق نشرت ثلاثة من المدونات في كتب طبعا نشر الكتب الثلاثة خلاني أتعرف علي المدونتين التانين والي لقتهم يستحقوا النشر فعلا ،كانوا فين دول من زمان وازاي ما كنتش أعرفهم ،أما بقي مدونة عايزة اتجوز فأنا باعتبرها صديقي الصدوق -علي رأي تيمون وبومبا -لأني قارئة مستمرة ليها و أول ما أخلص قراءة التدوينة أقول أمتي بقي تنزل التدوينة الجديدة وعشان كدة كنت متابعة موضوع الكتاب من عندها وكان نفسي قوي أشوفها في المعرض في حفلة التوقيع لكن معلش خيرها في غيرها ولما قالت إنها هاتطلع في العاشرة مساء برضة ما اشفتهاش لكني قلت لنفسي إنها أكيد هتنزل في المدونة لينك للحلقة وكل يوم أفتح وأبص علي الصفحة كأني مستنية النتيجة لكن بالقيها زي ماهي وأخيرا شوفتها،طبعا شكلها كان مختلف عن اللي في خيالي والشهادة لله شكلها هي أحلي ،كنت فرحانة بيها قوي كأنها بنتي ،أو كأني أنا الي في مكانها وقعدت أقول في سري ربنا يوفقك ،يمكن يكون دة كلام معجبين أحمد السقا وكريم عبد العزيز بس هو دة احساسي.

أول الشهر

2007-12-03T19:38:00.001+03:00

ياااه أخيرا قبضت ده أنا كنت حاسس ان أول الشهر دة مش جاي الشهر دة، أما أمد شوية عشان ألحق الأتوبيس و لا بلاش أتوبيس أنا هاخد تاكسي النهاردة أحسن الفلوس تتسرق، بس التاكسي هياخد ستة سبعة جنية لأ وكمان هيتأمر عليا ومش هيرضي يدخل لأخر الشارع عشان السوق ، طاب أنا ذنبي ايه ماهي شبرا كلها أسواق ،أه الوليه كانت عاوزاني اجيبلها خضار وفاكهه أما أقبض ،لأ مش هاجيب دلوقتي أنا حيلي مهدود طول النهار هي تبقي تنزل تشتري اللي هي عايزاه ماهي قاعدة مستتة طول اليوم مش كفاية مارضيتش تشتغل عشان تساعد فيمصاريف البيت، أه ياني لسة المحطة بعيدة ولسه هاجري ورا الأتوبيس واتشعلق فيه ولا أخد تاكسي لأ لأ حرام ادفع ستةجنية في مشوار واحد عشاني انا لوحدي ،أنا هاكمل عليهم واجيب للعيال نص كيلو بسبوسة يحلو بيها بقهم ،مش كفاية مابيدقوش اللحمة إلا في المناسبات ،أنا هاخد ميكروباص أحسن اهو الواحد يبقي قاعد في مكانة ومحدش يقدر يهوب ناحيتة صحيح بابقي شايف الأسفلت من أرضية الميكروباص بس برضة أمان علي الفلوس.... أهو واحد جاي استعنا علي الشقا بالله ،
- حاسب ياأسطي.
-يالا ياعم اركب .
-دة مفيش مكان.
-معلش يا سيدي أقف .
-أقف ازاي بس ياأسطي هو في مكان للوقوف .......ما دام مفيش مكان وقفت لي ليه طيب؟
-وبعديين معاك يا أستاذ انت.... الحق عليا اني قلت ارحمك من اللطعة في الشمس والقرف ...وبعدين حتي لو نزلت هتدفع لي نص الأجرة خلاص ده احنا قربنا لنص السكة .
-ماشي ياسيدي أمري لله ....أجرتك أهي هي توصيلة ولا أكتر.

-يالا يا حضرات موقف ...موقف.
-يانهار أسود جيب البنطلون مقطوع أنا اتسرقت يااخوانا حرامي... حرامي.
-فين يا حضرة الحرامي دة .
-معرفش بس جيبي أتقطع والفلوس اتسرقت منه.
-خلاص ياسيدي لما تبقي تعرفة ابقي انده علينا واحنا نعدمهولك العافية دلوقتي بقي روح علي القسم واعمل محضر يمكن يلاقوا الحرامي بتاعك ....
-ربنا يعوض عليك .
-لا حول ولا قوة إلا بالله.
-معلش يا أستاذ .

2007-10-02T23:36:00.000+03:00

رمضان كريم

2007-09-11T13:37:00.000+03:00

كل سنة وانتم طيبين...........خلاص رمضان جانا بكل حلاوتة وبهجته وجماله.....جانا بزحمة المواصلات في الحر والجوع وخناقات البشر اللي مش طايقة بعضها وفي نفس الوقت صبرهم وتحملهم واخلاقهم الجميلة اللي ما بتطلعش غير في رمضان والقرآن اللي في كل ايد.... والبنات اللي بتبطل تلبس الهدوم المحزقة والملزقة والولاد اللي بيبطلوا المعاكسة في خلق الله ويغضوا بصرهم ....وجانا كمان بزينة الشوارع والجوامع والمآذن والفوانيس المتعلقة في كل مكان...... وأذان رمضان بصوت الشيخ محمد رفعت اللي مفيش احلي منة واللمة علي الفطار وريحة الأكل اللي يجنن والخشاف والقمر الدين والتلات بلحات اللي لازم يتاكلو قبل الفطار ومفيش مانع يبقو خمسة ستة.....واللمة علي التلفزيون والضحك علي البرامج والمسلسلات الكتيرة وفي الأخر نستقر علي مسلسل واحد نتفرج عليه ........ولمة الولاد الصغيرين وهما مستنين بكار عشان ياكلوا مع الكبارو بيلعبوا مع بعض وكل واحد يعاير التاني ويقول له يا فاطر رمضان يا خاسر دينك القطة السودة هتقطع مصارينك ..يا صايم رمضان يا حامد ربك القطة البيضا هتبوسك من خدك ......والرجالة لما يلموا بعض عشان يصلوا العشا والتراويح في الجامع والستات يصمموا انهم يروحوا معاهم لأنهم مش اقل منهم.... وريحة الفول والزبادي ساعة السحور والانتظار الطويل للفجر عشان نصلية وننام ونصحي نصوم من جديد.....لكن اوحش حاجة في رمضان انه شهر واحد.....المهم تقضوه علي خير

بعيدا عن التاج

2007-09-05T15:36:00.000+03:00

لما دعتني بنت مصرية للمشاركة في يوم "كلنا ليلي" السنة اللي فاتت كنت متخيلة ان في حقوق كتير ناقصة البنات والسيدات المصريات لكن السنة دى وبعد زيارة قصيرة للسعودية اكتشفت اننا في نعمة حتي لو كنا لسة في فبعض المناطق في قهر للمرأة لكنة بمعدل بسيط لكن هناك قهر المرأة مقنن وممنهج يمكن بعض الناس يعتقدوا اني اقصد الحجاب او النقاب لكن الحجاب دة موجود في القرأن و امر رباني زي الصلاة والصوم واللي تتركة تبقي تركت فرض من فروض الاسلام ده غير بقي انه هناك من العادات والتقاليد ان المرأة تغطي وشها ومعظمهن مقتنعين بكدة وما يقدروش يمشوا بوشهم في الشارع اولا لانهم هيكونوا مكسوفين لان العين كلها هتكون عليهم ثانيا لانهم ممكن يضربوا من جماعة الأمر بالمعروف والنهي عن المنكر(خد بالك من اسمهم)اللي بمشوا في الشوارع و الاسواق بدعوي مراقبة الاخلاق وبيكون معاهم عصا طويلة كدة زي الخرزانة بتاعة المدرسين يضربوا بيها اللي كاشفة وشها اواللي مطول بنطلونة وطبعا حبيبه الكورنيش ،كمان هناك السيدات ممنوعات من قيادة السيارات بدعوي انها حرااام شرعا وأنا سمعت بنفسي امام المسجد النبوي بيقول كدة علي الرغم من ان الرسول (علية الصلاة والسلام)كان يسمح للسيدة عائشة بركوب الحصان وكان بيتسابق معها كمان ويخليها تسبقه كام مرة كدة وبالقياس فالحصان يبقي زي السيارة مش كدة ولا ايه ،دة غير ان منع السيدات من القيادة بيضطرهم ركوب التاكسي والله أعلم بسواقين التاكسي كمان لو واحدة عندها عربية لازم تجيب سواق ولان في ناس ما تقدرش علي مرتبات السواقين_عندهم برضة في ناس علي قدهم_بيخلوا ازواجهم او اولادهم يوصلوهم وانا شفت بعيني ولد لا يتجاوز سنة 15 سنة بيسوق عربية ضخمة جدا ركابها كلها من السيدات و الأطفال ،يعني الاطفال يسوقو زي ما هم عايزين وممكن يعملوا حوادث وبلاوي بس المهم الستات ما يسوقوش وبعدين يعني هي اللي عايزة تروح تعمل معصية او رذيلة مش ممكن تاخد تاكسي او اتوبيس مش حاجة صعبة اوي

كمان أنا ممكن اتخيل انهم يفرقوا بين الراجل والست في التعليم او العمل انما التفريق بينهم في التدين دي بقي اللي حاجة صعبة أوي مثلا الرجال مسموح لهم في المدينة انهم يدخلوا قبر الرسول (صلي الله عليه وسلم)في اي وقت أما السيدات مسموح لهم الدخول لمدة ساعتين في اليوم مرة بعد صلاة الفجر ومرة بعد صلاة الظهر ،تخيلوا بقي المنظر لأكتر من ألف سيدة محشورين في مكان ضيق جدا وكمان المفروض انهم يصلوا ويدعوا ربنا في مكان مش عارفين يوقفوا فية أساسا

ده غير ان فيه أماكن مش مسموح للسيدات بالتواجد فيها أصلا _ممكن يتهيأ لك انها أماكن عسكرية خاصة جدا لكنها مش كدة بالضبط_دي محلات ومطاعم بيمنعوا دخول السيدات بدون محرم يعني أي شلة ستات مع بعض مش مسموح لهم بالجلوس في الأماكن دي ودة بيخليهم يلجأو لحيل عشان يسمحولهم بالدخول ،لو معاهم بنت صغيرة بيلبسوها جلابية وعقال ويدخلوا زي ماهم عايزين

دة غير الصعوبات اللي بتواجها المرأة العاملة اللي غالبا بتكون مدرسة أو موظفة أما بقي الدكتورة والمهندسة فمالهاش نصيب في الجواز لأن الرجالة السعوديين بيرفضوا الزواج منهن إلي جانب الغلاسات اللي بتقابلها في السكة اللي يقولها ماتقعدوا في بيوتكم واللي يشتم واللي يعاكس

المشكلة هناك انهم مش قادرين يفهموا ان في أسر عايشة في الدنيا من غير محرم،ام أرملة مثلا وعندها بنات أو أب كبير في السن ومريض وعندة بنات مش معقول كل ما يخرجوا يندهوا لعمهم او خالهم عشان يخرج معاهم

2007-08-28T14:05:00.000+03:00

زمان وانا صغيرة كنت كل ما اسمع عن قضية فساد او يصعب عليا حال البلد او العرب كنت اقول لنفسي لما احنا نكبر(الجيل بتاعنا يعني)هنصلح الدنيا وتبقي بلدنا احسن بلد في العالم-تفكير عيال بقي-لكن دلوقتي كل ما اكبر افتكر سعد زغلول وهو بيقول مفيش فايدة الله يرحمة بقي كان عنده بعد نظر يعني مثلا الأمور علي حالها بقالها عشرين سنةولو حصل توريث -ودة الأغلب_هتفضل الأمور علي حالها تلاتين اربعين سنة كمان يعني مثلامصر سنة2040هتكون عاملة ازاي تخيلوا معايا كدة

رئيس تحرير الاهرام هيكتب في عمودة اليومي:يجب علينا ان نبوس ايدينا وش وضهر لأننا نعيش في ازهي عصور الحرية

جريدة المصري اليوم:جريمة تعذيب جديدة في اقسام الشرطة والداخلية تصر علي ان الوفاة بسبب انفلونزا الطيور

رئيس الوزراء:لقد حققنا هذا العام معدل نمو يتجاوز 100,8%و لا مساس بمحدودي الدخل

وزير الاستثمار:خصخصة البرج وقناة السويس لن يؤثر في الاقتصاد القومي وسيساعد علي ضخ الدولارات الي السوق المصري

وزير القوى العاملة:توريد الراقصات المصريات لدول الخليج لتخفيف معاناتهم من الحر

مذيع التلفزين:وهاقد جاء السيد الرئيس ليفتتح مع ابنائة هذا المشروع العملاق ويشاركهم فرحتهم بانجاز هذا الصرح الضخم وها هو السيد الرئيس وائل جمال مبارك يقص الشيريط معلنا بدء تشغيل هذا المشروع الفذ

محمد ثروت:اخترناك اخترناك وعشان كدة احنا بايعناك

عواد باع بنكه

2007-08-13T15:07:00.000+03:00

الأكتتاب الذي دعا اليه حزب الوفد وبعض احزاب المعارضة لانقاذ بنك القاهرة من البيع للأجانب بيفكرني بالأكتتاب الذي دعا له طلعت حرب لانشاء بنك مصر أول بنك مصري خالص للتخلص من سيطرة الاحتلال الانجليزي علي البنوك و الاقتصاد المصري وتجمع الشعب حول المشروع وتم انشاء بنك مصر بالاموال المصرية ......ياتري ممكن المشروع ده ينجح في سنة2007ولا الاحتلال الجديد هيمنع المصريين من انقاذ بنكهم..الله يرحمك يا عم طلعت حرب ،كل اللي بنيته بيتهد علي دماغنا ،مش بعيد كمان يبيعوا التمثال والميدان عشان ننسي ....بس احنا عمرنا ما هننسي

2007-08-05T17:09:00.000+03:00

اذا دعتك حلاوة الشهوة

فتذكر مرارة الذنب

الأيس كريم مولع

2007-07-14T12:57:00.000+03:00

اذا كنت من محبي الايس الكريم وكارهي الحر فأكيد لاحظت ان الأيس كريم كل صيف بيغلي سعرة عن اللي قبله وبيزيد علي الاقل ربع جنيه لأي نوع لكن برضة بيفضل في نفس الحجم ان ماكانشي اصغر يعني الكوباية اللي كانت ب75 قرش السنه اللي فاتت دلوقتي بقت بجنية والكونو المحترم بقي ب2.5 ده غير الانواع التانيه المستوردة اللي هي ايس كريم علي حق لكن غالية شوية، بس برضة مفيش مانع الواحد يشبرأ نفسه بيها في يوم من الايام

كل دة والناس ساكته وما بتتحركش ،ازاي الواحد يعيش في حر القاهرة دة من غير ايس كريم ازاي العيال الصغيرة ساكته المفروض يعملوا مظاهرات زي بتاعة الميه لأن الايس كريم حق لكل مواطن ولازم نطالب انو يكون موجود في بطاقة التموين الالكترونية النظيفةلأن احنا لو فضلنا ساكتين ممكن في يوم من الايام نلاقي الكوباية بقت ب5 جنية والكونو ب7.5عشان كدة لازم نعمل حاجة وانا من موقعي هذا(قدام شاشة الكمبيوتر يعني) اطالب بتكوين جمعية مستقلة لمحبي الايس كريم لتحقيق تلك المطالب ويكون اعضائها من اللي بيتولدو وفي بقهم معلقة ايس كريم .......حد بقي عايز يشترك

صور

2007-07-14T12:51:00.001+03:00

صور تتشابك

صور تتداخل

صورتتداعي

وصور تسدعي

صور تتحرك

وصور ثابته

افتح عينيك

او اغلقهما

تجد الصور

ولكن صورة واحدة

تبقي في العقل

وتحفظ في الوجدان

2007-07-14T01:02:00.000+03:00

kingdom of heaven

2007-07-10T20:26:00.000+03:00

من ساعة ما سمعت عن الفيلم دة و انا نفسي اتفرج عليه بسبب الكلام الكتير اللي صاحبة من ساعة ظهوره وكان من الغرب نقدا في الفيلم او حتي شتيمة في المخرج وطاقم العمل كلة لان الفيلم بينصر العرب علي الصليبين برغم ان مخرجه غربي والمفروض من وجهة نظرهم انه كان يصور المسلمين علي انهم مجموعة من الهمج و الرعاع وانه اعطاهم اكثر مما يستحقوا لكن المخرج الكبير رايدلي سكوت تجاوز تلك التخيلات واختار ان يعتمد علي التاريخ الموثق الذي اتفق عليه مؤرخي الغرب والشرق ويبتعد عن التشنجات والانفعالات فلم يقع في الخطأ الكبير الذي يقع فيه معظم مخرجي هوليود بتصوير العرب علي انهم شعوب بربرية فلو انهم كانوا كذلك فلن يكونوا في مستوي الندية لمواجهة الصليبين وينتصروا عليهم ايضا فهو كذلك يوضح بطريق غير مباشر ان جيوش الصليبين انهزمت من جيوش بدائية وبالتالي لا تستحق النصر

لذلك كان الفيلم في مجمله رائع جدا علي مستوي الصورة والمعارك والابهار الكبير وهو يتناول قصه بسيطة جدا

لبيليون ابن جودفري القائد الصليبي الشجاع الذي ينصب بعد وفاه والدة حاكما علي ابيلون جوار القدس التي يلجأ اليها بعد قتلة أحد رجال الدين معتقدا ان فيها النجاة والخلاص وذلك خلال فترة الهدنة بين صلاح الدين وملك القدس ويبدأ هذا الحداد البسيط يمارس مهامة كحاكم عادل يرعي الارض والبهائم ويبحث عن الماء ويعمل بيدية ليساعد عماله الي ان تاتي اليه سيبلا اخت ملك القدس في زيارة وتصرح له بحبها ويتبادلا الغرام الي ان تنشب الحرب من جديد بسبب مكائد زوجها و رينو دي شاتيون في حق المسلمين فيضطر ملك القدس ان يعلن الحرب ولكنه يموت دون ان يتمها ويتم تتويج زوج اختة المتعطش لدماء المسلمين ملكا علي القدس ويتبع في الحرب نصائح رينو التي تورطه مع المسلمين الي ان يقعا في الاسر ويتم اعدام رينو اما الملك فيبقي عليه صلاح الدين ويتولي بيليون حماية القدس ويستميت مع سكانها في الدفاع عنها برغم حصار المسلمين الشديد ويواجة في ذلك رجال الدين ويخالفهم كثيرا في سبيل حماية القدس الا ان المسلمين ينجحوا في دخولها ويستسلم بيليون اخيرا ويعقد صلاح الدين اتفاقية مع بيليون لضمان سلامة خروج سكانها من المحاربين واخيرا يخرج منها مع حبيبتة سيبلا بعد ان اكتشف انها لم تكن مملكة الجنة التي توقعها وينتهي الفيلم بوصول ريتشارد قلب الأسد لتبدأ حملة صليبية جديدة

وفي رأيي ان شخصية بيليون تعبرعن دور القائد الصليبي العادل الذي يتساوي صلاح الدين و يتحري الصدق والحق بعد توبته من كل خطاياه التي اقترفها في حياته السابقة و يحاول ان يكون القائد المثال الا انه يقع في الخطأ حينما يشترك مع سيبلا في خيانتها لزوجها من انه المفروض انه يحاول الابتعاد عن كل الخطايا لينال الغفران

ايضا وقع المخرج في خطأ ربما لن يلفت نظر احد سوي المسلمين الذين قد يشاهدوا الفيلم وهو انه في احد المشاهد جمع ما بين الأذان وصلاه جيش صلاح الدين قبل بدء احد المعارك و ربما كان يجب علي الممثلين العرب ان يتنبهوا لتلك الملحوظة رغم ذلك كان أدائهم اكثر من رائع خاصة الممثل السوري في دور صلاح الدين _الذي لا أعرف اسمه مع الأسف-واللقطات القصيرة التي جاء فيها خالد النبوي ولكنها مميزة

من الآخر كدة كان فيلم ممتع للعقل والعين والقلب

sunset

2007-07-02T21:34:00.000+03:00

2007-07-01T14:21:00.000+03:00

أعتقد ان مقال الاستاذ مجدي مهنا هذا اليوم له من الأهمية ان ينشر في الصفحة الأولي بكل الجرائد -المعارضة طبعا-لأنه يؤكد مخاوف كانت تراودنا من زمان بخصوص قضية التوريث وجاء وقت التحقق منها،وهاهو المقال

فى الممنوع بقلم مجدى مهنا ١/٧/٢٠٠٧
حمل المانشيت الرئيسي لصحيفة «الفجر» في عددها الأخير هذا العنوان المثير: «مبارك: لو الشعب عايز جمال يجيبه»
وفي تفاصيل الخبر الذي نشر علي الصفحة السادسة.. ذكرت «الفجر» أن لقاء الرئيس حسني مبارك بأعضاء الهيئة البرلمانية للحزب الوطني في مجلس الشوري.. تضمن مفاجأة كبيرة، وقال الرئيس مبارك عبارته السابقة: لو الشعب عايز جمال يجيبه.
وقال الرئيس مبارك إنه يرفض التوريث أو الخلافة في رئاسة الجمهورية، وإن مصر لم ولن تعرف التوريث أو الخلافة، ثم قال إن لدي مصر دستوراً وقانوناً يحددان بدقة إجراءات وقواعد الانتخابات الرئاسية بين مرشحين عديدين، وأضاف عبارته المهمة: لو الشعب عايز جمال يجيبه.
إذن الرئيس مبارك ـ بداية ـ لا يعتبر صعود نجله جمال إلي منصب الرئيس، في ظل الوضع الحالي، توريثا.. ولا يعده خلافة لحكمه، بل يعتبره انتخابا حراً وديمقراطياً.
ولا يكفي أن تنشر «الفجر» هذا الكلام الخطير، الذي يرد علي لسان الرئيس لأول مرة، دون تدقيق.. كأن تنشر كيف دار الحوار بين الرئيس ونواب الحزب الوطني في مجلس الشوري؟ ومَنْ تحديداً النائب الذي سأل الرئيس؟ وما صيغة السؤال؟ وهل كان السؤال مفتعلا ومتفقا عليه، أم أنه ألقي بشكل طبيعي وتلقائي؟ وهل السؤال كان شفاهة أم أنه جاء مكتوبا في ورقة؟ لأنه إذا كان مكتوبا في ورقة، فمن المؤكد أن المنصة هي التي سمحت بتمريره، وأنها أعادت صياغته، وأن هناك اتفاقاً علي تسريب هذا السؤال؟
وحتي لو كان السؤال شفهيا، فمن المؤكد أنه تم الاتفاق عليه أيضا، وكلمات الرئيس محسوبة بدقة ومختارة بعناية.
كلام مهم وخطير مثل هذا، لابد من التحقيق والتدقيق وتقصي الحقائق حوله، لأنه لا يقال في الهواء الطلق ولا يقال علي عواهنه، وقائله ليس الدكتور حسام بدراوي، لكنه رئيس الدولة.. وستترتب عليه نتائج وتداعيات تتعلق بمستقبل الحكم في مصر.. كما أن كلام الرئيس مبارك يقدم الدليل الدامغ ـ في حالة صحته ـ علي أن ملف التوريث يتم تنفيذه، وأنه يجري حاليا ترتيب الأوراق وتوفيق الأوضاع.. ويفسر لماذا خرجت نتائج انتخابات الشوري الأخيرة بنتيجة لم ينجح أحد غير الحزب الوطني..
فهو يريد السيطرة علي المجلسين «الشعب والشوري»، ثم علي المجالس المحلية بعد ذلك، بما لا يمكِّن جميع القوي السياسية من الحصول علي نسبة الـ ٥% اللازمة لأي مرشح للترشح علي منصب رئيس الجمهورية، فيما عدا مرشح الحزب الوطني، الذي هو في هذه الحالة السيد جمال مبارك، وكما قال الرئيس مبارك: إذا كان الشعب عايز جمال يجيبه؟
ولن أدخل في جدل حول: هل وصول جمال مبارك إلي كرسي الرئاسة في ظل فترة رئاسة والده أو بعدها مباشرة يعد توريثا أم لا؟.. لأن المسألة محسومة، فهو توريث ابن توريث، ومن يقول غير ذلك جاهل وكاذب ومغرض، حتي لو كانت القوانين والدستور تسمح لجمال مبارك بهذا الحق!.. فمتي كان للشعب حق الاختيار؟ وأي اختيار للشعب في ظل القوانين التي تم تفصيلها علي مقاس مرشح الحزب الوطني؟
فقط أطلب من الزميلة منال لاشين، المحررة البرلمانية لصحيفة «الفجر»، أن تدقق في تلك المعلومة وأن تؤكدها.. حتي نتعامل معها علي أنها الحقيقة أو العكس.
يارب ارحمنا.. برحمتك.

2007-06-29T17:43:00.000+03:00

أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!

صلاح جاهين

2007-06-27T02:38:00.000+03:00

from flickr

2007-06-27T01:56:00.000+03:00

زواج في خمسة ايام بقية

اليوم السادس

عاشا معا اجمل لحظات حياتهما ولم تتركهما السعادة حتي بعد انجاب طفليهما طفلة في غاية الجمال ورضيع في قمة الوداعة

اليوم السابع

طحنته الحياة مابين طلباتها وطلبات ولديه الذين لا يستطيع ان يرد لهم طلب وإلا ذاق الويل،وكثيرا ما هاجمته الافكار في تلك اللحظة بين الغفلة واليقظة،لماذا لم تعد تهتم بي ؟لماذا لم تعد تحبني مثل السابق؟تري هل السبب الحياة الصعبه ام ان نهر الحب جف من قلبها؟

اليوم الثامن

طحنتها الحياة لم تصبح مثلما كانت قبل سنوات وهو ايضا تغير لم يعد يحبها ،هي تشعر بذلك لم يعد يهتم بها،ويبادلها كلمات الحب والغرام كالسابق،وهي التي تنكرت من دينها وفرت من أهلها من أجله

اليوم التاسع

قررا وضع حد لمعانتهما معا واتفقا علي الطلاق وعندما سألها قالت انها سترجع لأهلها تتمني رضاهم

اليوم العاشر

الابن مع أباه والابنه مع امها وحتي الأن الاخ لا يعرف شكل اخته والأخت كذلك ويستحيل ان يتقابلا صدفه فلا هو يدخل كنائس ولاهي تتردد علي المساجد

2007-06-26T16:08:00.000+03:00

from flickr

عودا أحمد

2007-06-22T16:06:00.000+03:00

الحمد لله،بعد عذاب طال حوالي شهرين عدت إليك مبعد معاناة من غياب الكمبيوتر،والسبب ان الهارد فرقع في وشي،ومرضيش يشتغل ابدا ولا بالذوق ولا بالعافية،رغم انه اتعرض علي اكتر من باشمهندس(علي الأقل هم فاكرين نفسهم كدة)لكن برضه رفض يستجيب للعلاج وكلهم شخصوا حالته بالوفاة وان مفيش اي أمل،ولأننا كنا في فترة امتحانات،فطبعا الأسرة الكريمة رفضت كل محاولات شراء الهارد إلا بعد ما تعدي الفترة دي علي خير والحمد لله انهم ما قالوش بعد ما نطمن علي النتيجة،لكن في الأخر الهارد جه برضة ،طبعا انتو مش عارفين حالتي في الفترة العصيبة دي كانت عاملة ازاي ، يعني مذاكرة وكمان مفيش كمبيوتر لكن خلاص العهد ده راح ومن هنا ورايح هاقعد علي الكمبيتر بانتقام مش هاقوم الا علي النوم ويمكن انام قصاده كمان صحيح الواحد مابيعرفش قيمة الحاجة غير لما تضيع منه،

2007-04-26T12:43:00.000+03:00

from flickr

تاج من ذو النون المصري

2007-04-11T21:17:00.000+03:00

بما ان ذو النون المصري بعتلي 3تاجات مختلفين فانا هاستعبط وارد علي الاتنين الاخرانين لأن الأول ببساطة مكون من سؤال واحد

الأول

هل تسعد حينما يمرر لك أحدهم تاج؟

بصراحة باطير من الفرحة،ببساطة لأن التاج يعني ان أحدهم مهتم بي وعايز يعرف عني أكتر ،مش عارفة الاحساس دة هيفضل ملازمني علطول بعد كدة ولا علشان دة أول تاج حد يمرر هولي(ربنا يكتر من تاجتكم)و

هل مقدار سعادتك او شعورك ايا كان عند تمرير التاج لك يختلف حسب المدون الذي يمرر لك التاج؟

ما اعتقدش لأن ايا كان اللي بيمرر التاج فأنا بهتم به واحاول ارد علية في اقرب فرصة،لكن متهيأ لي انه لو كان شخص جديد لا أعرفه هتزداد سعادتي ،لأن دة معناه ان في لسه اقبال علي قراءة البلوج بتاعي

هل تستمتع عند اجابتك علي أسئلة التاج؟

طبعا,والا ماكنتش جاوبت عليه

هل ترى للتاج أهمية حقيقية؟

طبعا هو مهم جدا،هو في الحقيقيه شبه اسئلة اعرف نفسك اللي كانت موجودة في مجلة ميكي زمان(وعلي فكرة انا كنت باحب أجاوب عليها كلها) يعني اسئلة متعددة تحت عناوين مختلفة زي مثلا هل انت صديق وفي؟،هل انت محب للحيوانات؟،هل أنت طفل مدلل؟...وهكذا وبعد ما اجاوب علي الاسئلة اللي تحت العناوين دي كنت باكتشف فيا صفات كتيرة ما اكنتش اعرفها عن نفسي وبما ان التاج بيبقي مقروء لكل الناس ده بيخليهم يكتشفوا ابعاد خفية في شخصيتي خاصة اذا كانت اسئلة شخصية

هل فكرت في عمل تاج خاص بك؟

قبل كدة ما فكرتش لكن دلوقتي فكرت

هل تفضل قراءة التاج عند المدونين الأخرين ام لا تهتم سوي بالتدوينات الاخري فقط؟

اه طبعا بهتم وباسعي وراه كمان

عندما ترد علي التاج ما الذي تراعية اكتر؟

الصراحة والصدق

الي من تحرص علي تمرير التاج؟

لمن اتابعهم في قراءة مدوناتهم

هل تحرص علي قراءة اجابات التاج عند من تمررة لهم؟ وهل تغير اجابتهم شئ في ادراكك لهم؟

اكيد طبعا امال كنت بامررة ليه أصلا إلا اذا كنت مهتمة بهم وباجابتهم

هل تلتزم حرفيا باسئلة التاج؟

باحاول

ما هي نوعية التاجات التي تفضلها؟

بافضل النوعية الللي تكشف لي عن جوانب شخصية سواء عندي او عند غيري

الثاني

هل كنت طالب شاطر في المدرسة؟

اه كنت طالبه شاطرةلحد رابعة ابتدائي كدة وكنت علطول الأولي لكن في سنة رابعة المدرسين كانوا وحشين قوي وعواجيز وما كنتش بافهم منهم حاجة عشان ماكنتش بحبهم وساعتها ما اكنتش اعرف يعني دروس خصوصية ومن ساعتها و انا مش عارفة اطلع الأولي تاني

ماهي أحب مادة وأسوا مادة في المدرسة والكلية؟

اكتر حاجة حبيتها هي التاريخ خصوصا التاريخ الحديث وبالذات فترة محمد علي وما تلاها لأني ببساطة باحترم الراجل ده وبحبة جدا وباشفق عليه اما اسوأ مادة فهي العربي (بتاع الكليةمش بتاع المدرسة)لأني لحد دلوقتي معرفش ايه المغزي العبقري من دراسته وهيفيدني بإيه في حياتي العملية خصوصا انه متخصص قوي

كنت عاوز تطلع ايه وانت صغير؟

وانا لسة صغيرة وما طلعتش من البيضة كنت عاوزة أكون دكتورة اطفال زي كل البنات بعد كدة كنت عاوزة أكون مهندسة ديكور لأني اكتشفت انهم بيكسبوا كويس اوي(انا ماباحسدش أنا باقر بس)،بعد كدة حبيت أكون صحفية ولما فشلت دلوقتي عايزة أكون اي حاجة ان شاالله حتي موظفه في السجل المدني بس ألاقي شغل

من ستمرر لهم التاج؟

بنت مصرية

علا مراسلتنا من غزة

واحدة مصرية

لست أدري

اتنين من الناس

وأي حد أقابلة جديد

2007-04-09T18:16:00.000+03:00

كل فسيخ وبيض ورنجة وبصل وخس وملانة .........وانتو طيبين

من الآخر كدة كل شم نسيم وانتو طيبين وبخير

2007-03-28T22:59:00.000+03:00

لو لم أكن مصريا لوددت ان أكون موريتانيا

أكيد لو كان مصطفي كامل عايش بينا دلوقتي

كان غيرجملتة الشهيرة بمناسبة الأستفتاء

النظرية المدرسية الأولي لبوسي كات

2007-03-14T22:07:00.000+03:00

دائما واحنا في المدرسة المدرس المحترم بنحترمة وبيفرض هيبتة علي الطلبة ونخاف نكح في حصتة،والمدرس المحبوب بيبقي اخونا الكبير اللي بنشكيلة الهموم(الدراسية فقط والله) ويساعدنا في اي حاجة نطلبها منة ،تبرع كدةمن غير اي مقابل حتي ممكن يعطل نفسة عشان يساعد الطلبة ان شاالله حتي في نشاط مدرسي،اما بقي المدرس المنشار(يعني طالع واكل نازل واكل)فدة بقي بيجي المدرسة عشان يرتاح من ماتش الدروس بتاع اليوم اللي قبلة،وفي نوع تاني بقي من المدرسين وهو المدرس اللي لا مؤاخذة عبيط (معلش هو كدة فعلا) ودة بقي شخشيخة المدرسة كلها من اول عم سعيد البواب لحد الناظرة .والنظرية دي كونتها بعد13 سنة خدمة في المراحل المختلفة (تلك مقدمة منطقية واستهلال لابد منة).وكنت فاكرة اني علي حقفي النظرية دي لحد ما بقيت احدي طالبات الجامعة المصرية العريقة .كل اللي كان يقابلني في الفترة الانتقالية دي كان يقول لي علي فكرة الجامعة مختلفة عن المدرسة خالص ،دة عالم واسع مختلف تماما ،خلي بالك،وبصراحة عمري ما لاحظت ان الكلية بتاعتي مختلفة عن المدرسة خالص بالعكس دي مدرسة برضة بس كبيرة شوية الحاجة الوحيدة المختلفة هي الناس اللي بتدرس لنا (الدكاترة يعني) ناس عجيبة مختلفين تماما عن النظرية اللي انا وضعتها،كل واحد فيهم فاكرنفسة انه خلاص عشان خد الدكترة وصل لنهاية العلم،و بالتالي تكون نزعة الغرور عندهم عالية شوية(بصراحة عالية جدا)رغم انهم كانوا زيهم زينا بيدرسوا نفس المناهج وبيقعدوا في نفس الاماكن لكن تقول اية اللي علي علي ،سعات كتيرة بيتهيألي انهم اخدوا الدكترة دي عشان يقرفونا بيها ،بيعاملونا علي اننا جربة أو مرض افريقي عضال ،لو واحد قرب منهم تلاقي الواحد منهم يرد بكل تناكة وكأن لسان حالة يقول ما تبعد شوية يا بني آدم هتوسخ لي البدلة أو اية الريحة اللي تقرف دي همة لغوا الحمي في المدينة السنة دي،وهلم جرا وكأننا نتسول منهم المعلومة ويدوهلنا بطلوع الضرس علي الرغم انها معلوملت اساسية لازم يقولها لنا
ثم الامتحانات وما أدراك ما الامتحانات تجد فيها العجب العجاب ،اللي كتب اي كلام تلاقية يعدي وممكن يجيب تقدير كمان واللي حل بما يرضي الله ربنا يتولاه بقي كأنهم بيصححوا الورق بطريقة حادي بادي واحد مقبول وو احد امتياز وانت وحظك بقي
احسن ناس يفهمونا هما المعيدين والمدرسين المساعدين لأنهم بيكونوا لسة مانسيوش مرحلة العذاب الطلابي أو المرحلة الجامعية كما يسموها في تلفزيون الحكومة.طبعا مش كل الدكاترة كدة فية قلة مندسة بينهم عندهم ضمير وبيراعوا ربنا فينا ،لأنهم عارفين ان العلم دة هيتسئلوا علية ولكن دول بقي مطحونين زيهم زينا وتقول لي بعد كدة تطوير التعليم الجامعي، يا عم الله يحنن عليك

2007-03-09T20:19:00.000+03:00

سبحان الله

2007-03-01T15:27:00.000+03:00

حد شاف قبل كدة طفلة عندها 8 سنين تقعد في البيت في الاجازة وتترجم القصة الانجليزي اللي بتاخدها في المدرسة للعربي لمجرد التسلية بدل ما تقعد قدام التلفزين تتفرج علي توم وجيري او تلعب مع بقية اخواتها

الطفلة دي بقي تبقي انا ، بس من كام سنة كدة، الحكاية دي انا افتكرتها بعد ما لقيت في نفسي حب الترجمة للعربي بالذات .فقعدت افكر علي اصل هذا الحب للترجمة وافتكرت الحكاية دي واول حاجة جت في مخي بعدها اني كنت طفلة غريبة قوي ، دة انا كان ممكن اطلع عبقرية بس عمر الزمن مابيسيب حد في حالة

valentine's day

2007-02-14T15:10:00.000+03:00

love 4ever

2007-02-13T21:25:00.000+03:00

المسجد الأقصي

ربنا يستر عليكي يا مصر

2007-02-10T23:54:00.000+03:00

كل كام يوم لما افتح الجرنال -حتي لو كان بتاع الحكومه- الاقي في صفحة الحوادث عنوان ما بيتغيرش الا في عدد الضحايا هو اختناق عائلة بسبب تسرب الغاز و فضلت الحوادث دي في تزايد مستمر ومش معقول تكون كل دي صدف وقلت في عقل بالي اكيد فيه سر في الموضوع يمكن دلوقتي بيركبوا مواسير بتسرب الغاز او فيها عيوب من اي نوع ومفيش حاجه بعيدة علي حكومتنا النظيفة وفضلت ادور علي السر وانتو عارفين دماغي تعباني معاها. لحد ما اخيرا عرفت السر

العيب يا اخوانا طلع في الانابيب وبالتحديد في محابس الانابيب اللي هيه المفروض بتمنع تسرب الغاز

المحابس دي بقي يا سيدي مش مطابقة للمواصفات -زي قرب الدم كدة- والمشكلة ان مش بتاع الانابيب هو اللي بيتبرع ويركبها علي الانابيب بتاعته لأ دة المصنع بذات نفسه هو اللي معتمدها في تصنيع الانابيب يعني من غير مقاطعة كدة كل الانابيب محابسها بايظة والدليل علي كدة الحادثة اللي حصلت جنب المنيب امبارح في قرية طموة وكانت بطلتها الانابيب والمحابس ولولا ستر ربنا كان زمان ضحاياها الوف مؤلفة من سكان المنطقة لكن الحمد لله ربنا ستر ومن هنا تيقنت من الجملة المصرية المأثورة احنا عايشين بالستر

سعادة الوزيرة

2007-01-25T18:29:00.000+03:00

دايما باتبهدل في المواصلات بمعني اني اقف استني الاتوبيس او الميكروباس ساعتين تلاتة لحد مايجي وبعد كدة تبدأ مرحلة جديدة من الشقاء ،تبدأ بمزاحمة قوي الشعب العامل من اجل الوصول الي الباب ، الباب بس ،الي هوه اهم حاجة ما دام وصلت له يبقي اعتبر نفسي وصلت محطتي،ومش مهم طبعا ايه اللي بيحصل جوة الاتوبيس او الميكروباس من معاناة وكدح في سبيل الوصول الي الهدف المنشود ولكن برضو مش عاوزه انسي الاوقات الحلوة لما أكون في حالة لا تسمح بهذا الكم من البهدلة ويكون في جيبي قرش بأقف في وسط الشارع وبكل ألاطة الدنيا اشاور لأي تاكسي علشان كدة في كل لحظة من اللحظات دي باتمني اني أكون وزيرة مواصلات ولو لسنة واحدة -معلش اصلي طماعة شوية- ودة لأني حاسة ان حل المشكلة دي محتاج ان الوزير يكون مطحون في المواصلات زينا عشان يعرف ايه اللي ناقص فيها ،شوية حلول بسيطة لكن تأثيرها كبير ، أقولكم مثلا شوية قرارات هاتخدها
مثلا،محطات الاتوبيس والميكروباص لازم تكون واضحة ومميزة في أماكن محددة ويلتزم بيها السواقين والركاب
تاني حاجة:زيادة عدد الاتوبيسات وخاصة في اوقات الذروة وفي الاماكن الزحمة زي وسط البلد وجمهورية شبرا العظمي
بعد كدة، نقدر نثبت مواعيد للاتوبيس بحيث تكون متوافقة مع مواعيد المدارس والجامعات والمصالح الحكومية والاعمال بشكل عام
وكمان يقتصر عدد ركاب الاتوبيس في كل رحلة علي عدد الكراسي يعني يكون مفيش حد واقف غير الكمساري وبس ودة ممكن يحصل في حالة ان الاتوبيسات تكون كافية ومواعيدها مظبوطة يعني اللي يلاقي اتوبيس مليان مفيهاش حاجة يستني عشر دقايق وياخد اللي وراة عشان يقعد فيه ويستريح بس طبعا ده هيحصل لوكان متاكد ان اللي وراه هيجي في معادة وفاضي كمان

اما بقي بالنسبة لمواقف الاتوبيسات فلازم تكون نظيفة ومريحة ومليانة كراسي لأن كتير اوي من روادها من كبار السن

اي رأيكم في شوية القرارات الحلوة دي

بس بما ان عمري ما هاقدر احققها انا قررت اريح نفسي واشتري عربية واتعلم السواقة مش بالذمة اريح

2007-01-25T12:36:00.000+03:00

ياااااااااااه أخيرا الامتحانات خلصت ولو ان معظمها كان بايخ ورخم وربنا يستر علي النتيجه ،مش عارفة ليه انا بدأت احس بالغباء في الكلية دي وبالدات السنة دي مع اني كنت من المتفوقين في الثانوية العامه ،لكنها بردو مش مقياس ،دة مدرس الرياضة كان سعات كتيرة أما يزهق من الشرح يحفظنا المسائل وأهو كله ماشي، علي العموم انا مش هاوجع دماغكم بحواديت المداكرة والكلية والامتحانات خلاص المهم ان احنا خلصنا علي خير ورجعت لقواعدي سالمة بعد ماوحشني التدوين واصدقائي الافتراضيين بصراحة انا كنت ماسكة نفسي بالعافيه عن الكمبيوتر وكل ماعدي من جنبة شوشو(الشيطان) يوزني ويقول لي ما تفتحيه ربع ساعه هيحصل ايه يعني وامد ايدي علي زر الباور وخلاص هادوس لكن ارجع أفكر الكمبيوتر بطئ وعقبال ما يحمل صفحه تكون فاتت نص ساعة فطبعا هازهق واقوم فاتحة اي لعبة من اللي يحتاجوا لساعتين فما فوق وفي الأخر هاقوم من غير ماكون عملت حاجة غير اني ضيعت وقت وخلاص. و أحيانا كنت باسمع كلام شوشو علي اساس ان ايه يعني ساعتين تلاتة لكن المهم بعد كل ده ان الفترة دي عدت علي خير ومش مشكلة اني جاللي انيميا ووشي اطبق علي بعضه وبقيت عامله زي بتوع المجاعات لكن مش مشكلة بحلتين محشي كل شيء يرجع لأصله

ودمتم

2006-12-02T22:34:00.000+03:00

حاجات كتير أوي عايزة اقولكم عليها لكن للاسف الوقت مش مساعد، الامتحانات قربت،ولازم اداكر عشان ان شاء الله اجيب تقدير وألاقي شغلانه تلمني في المستقبل القريب، يارب يوفق كل الطلبة ،ان شاء الله نتقابل في اجازة نص السنة الا ادا جد جديد وكان فيه كلام مهم أوي محشور في زوري لازم أقوله......... ،ادعولي بالنجاح

2006-11-27T22:24:00.000+03:00

في يوم من الأيام في احد شوارع القاهرة ،شفت اتوبيس من اللي بيستخدمة ضباط القوات المسلحه واللي بيشتغل بالمجان في معرض الكتاب ، لكن الاتوبيس دة بقي كان فيه اجانب ،ايوة اجانب شعر اصفر وعيون ملونه وبشرة بيضا اتحرقت من شمس القاهرة، هما الاجانب زي اللي في الكاتلوج بالضبط...، الغريب ان بعضهم كان لابس زي عسكري مختلف شوية عن بتاعنا بس برضه شبهة وجالسين جنبا الي جنب مع الضباط المصريين

حاجة غريبة مش كدة لكن اكيد ليها تفسير يعني مثلا ان السواق مأجر الاتوبيس لشركة من بتوع السياحة ودول سياح جايين يسيحوا عندنا لكن كانو لابسين عسكري ليه ؟!!وقاعدين مع الضباط بتوعنا كمان؟!! أه... ممكن يكونو خبرا أجانب زي الخبرا الروس اللي كانوا مالين البلد زمان وجايين يعلموا الجيش بتاعنا عن شوية أسلحة جديدة جايز.... او يمكن يكونوا شوية امريكان من العراق واخدين اجازة من الحرب وجايين يقضوها عندنا عشان بعد كدة يرجعوا شغلهم قصدي حربهم او يمكن يكونوا مجرد ضباط مصريين بس من المنصورة وخلاص هو لازم كل حاجة افهمها انا مخي دايما كدة تاعبني معاه

2006-11-19T10:43:00.000+03:00

حاجة بايخة أوي لما يطلع علينا وزير المفروض انة فنان و مثقف ويقول ان الحجاب عودة للوراء امال ايه اللي دفعة للأمام مهرجان المسرح التجريبي اللي كل سنه يلموا له متفرجين عشان يملوا القاعات وياريت بينفع .لأ وبعد ما قال الكلام السمج دة يقولك ده رأي مش قناعة الوزارة ،طب ما هو دة رأي وزير مش رأي ابو محمد جوز عمتي معني كدة انه اكيد هيدخل في قناعة الوزارة والحكومه كمان

وبعدين ليه بيعتقدوا ان الحجاب نتيجة للتخلف والقهر هو انا عشان ابقي حرة لازم البس اللي علي مزاجهم.وبعدين انا حرة البس حجاب ،البس ميني جيب ،انا حرة وحريتي اختارت الحجاب هما متضايقين ليه

لكن باين ان سعادة الوزير مطمن علي نفسه علي الآخر لأنه كل مايعمل حاجه يقول بقلب جامد انا مستقيل وطبعا الاستقالة تترفض لأن الدولة في امس الحاجة لابداعه الثقافي ولفنه الرفيع وكاننا من غيره هتنسحب الثقافة اللي في عقولنا في حركة احتجاجية علي استقالتة وطبعا علشان نحافظ علي ثقافة مصر هنضطر نستحمله للأبد زيه زي غيرة وإلا مايبقاش مصري ولا نبقي احنا مصريين

2006-11-18T18:46:00.000+03:00

كتير أويي بتخرج في بلدنا المظاهرات ضد التوريث وتعديل المادة 76 العرجاء وتطالب بانتخابات حقيقية لاختيار رئيس منتخب فعلامن الشعب لكن في حد فكر الرئيس اللي احنا عاوزينة دة هيكون مين وعامل ازاي مش اسمةوشكله لكن من ناحية صفاتة وشخصيتة يعني مثلا انا عاوزة اللي يمسك مصر يكون بيحب مصر جدا ويتقي الله فيناوما يكونش من الجيش،كفايه بقي اللوأت اللي ماسكين البلد وخربوها ،بكدة ممكن يكون رئيس ملتزم ومحترم ولا رأيكو ايه؟؟؟؟؟

2006-11-17T13:12:00.000+03:00

القلعة

2006-11-17T13:10:00.000+03:00

مسجد السيدة عائشة

2006-11-07T21:18:00.000+03:00

صالح عطيه...أصغر جاسوس في العالم
قصة هذا الجاسوس قصة فريدة بالفعل فهي تجمع بين جنباتها الغرابة والطرافة والإثارة في وقت واحد.. هي قصة طفل مصري كان يرعى الأغنام ويقوم بتربية الدجاج في صحراء سيناء.. اندفع في طريق المخابرات العامة المصرية التي كانت وقتها تدير حربا من نوع خاص مع العدو الإسرائيلي بعد نكسة 1967حققت فيها انتصارات ساحقة لم يفق منها العدو إلا على انتصار اكبر في أكتوبر1973م.. الطفل صالح واحد من أبطال عالم الجاسوسية والمخابرات الذين خدموا وطنهم في الصغر والكبر فكما كان صالح وقتها اصغر جاسوس في العالم وأكبر من اذاق العدو الصهيوني مرارة الهزيمة، الآن هو يحتل موقعا حساسا في أحد الأجهزة الأمنية المصرية وكأنه أخذ على عاتقه خدمة الوطن وحمايته في الكبر والصغر. في العام 1968 وبينما تلقي النكسة بظلالها على الجميع وتعيش إسرائيل في زهو بأنها ألحقت الهزيمة بالجيش المصري، واحتلت شبه جزيرة سيناء، وأقامت الحصون والمواقع المنيعة بطول القناة وداخل الأراضي المصرية التي سيطرت عليها كانت هناك بطولات على الجانب الآخر أسفرت عن نتائج باهرة كانت في طي الكتمان إلى وقت قريب حتى تم الكشف عنها ومنها قصة الطفل المصري «صالح» أصغر جاسوس في العالم... فبينما كان مكتب المخابرات المصرية في شغل لا ينقطع لجمع المزيد من المعلومات عن العدو، وعدد قواته، ونوعية الأسلحة التي يمتلكها وطبيعة معيشة جنوده، والحراسات الليلية، وطبيعة حصونهم، كان «صالح» يعمل في جو الصحراء المحرقة على رعي الأغنام وتربية الدجاج محاولا الاحتماء بظل الكوخ الصغير الذي يقطنه والده الشيخ «عطية» وأمه «مبروكة علم الدين» وذلك بالقرب من بئر قليل المياه داخل سيناء. كان الطفل يداعب طفولته مع الأغنام والدجاج، ويتأمل الفضاء الواسع بخياله المتطلع إلى السماء، لم يسرح خياله إلى أن يكون علامة مضيئة أمام القوات المصرية وهي تعبر قناة السويس لتحقق النصر وترفع القامة العربية عاليا في كل مكان، ولم يفكر يوماً في أنه سيكون مساعدا للمخابرات المصرية خلف العدو الإسرائيلى، ويقوم بزرع أدق أجهزة للتصنت داخل مواقع الجيش الإسرائيلي ليصبح أصغر جاسوس عرفه التاريخ. تجنيد الطفل ظلت المخابرات تفكر في كيفية الحصول على المعلومات من خلف وداخل مواقع العدو، وكيف تحقق درجة الأمان العالية لمن يؤد هذا الغرض؟ وفي ظلمات الليل الدامس والرياح الشديدة تسلل ضابط مخابرات في ذلك الوقت ويدعى «كيلاني» إلى أرض سيناء، وكان متنكرا في زي أعرابي يتاجر في المخدرات، تحدى الضابط صعوبات الصحراء حتى وصل إلى بئر المياه، وأخذ يتناول جرعات منه، وشاهده والد الطفل صالح، وكعادة العرب ضايفه في كوخه الصغير، ودار حوار بين الضابط المتنكر في زي تاجر، وعطية والد صالح انتهى بتكوين صداقة، أراد الضابط تجنيد الأب لصالح المخابرات المصرية ولكن حدث أثناء استضافة والد صالح للضابط الذي كان حريصا في معاملاته وسلوكه حتى يتعود الأب عليه أن أقنعه أنه بانتظار عودة شحنته التجارية، وفي اليوم التالي ترك الضابط مجلس الأب عطية وأخذ يتجول حول بيته يتأمل السماء حتى وصل إلى الطفل وأخذ يداعبه حتى لا يشك الأب في سلوكه، وإثناء ذلك خطر ببال ضابط المخابرات المصرية أغرب فكرة وهي تجنيد الطفل صالح بدلا من الأب وتعليمه وتلقينه دروسا في التخابر، وكيفية الحصول على المعلومات من العدو الصهيوني، وأخذ الضابط يدرس هذه الفكرة مع نفسه خاصة أنه من الصعوبة الشك في طفل، كما أن الطفل نفسه يحمل روحا وطنية وهذا ما لاحظه الضابط، الذي ظل أياما معدودة ينفرد بالطفل بحذر شديد حتى استطاع تجنيده، وعندما اطمأن إليه وإلى قدرته على استيعاب ما طلبه منه، وقدرته على تحمل المهمة الصعبة قرر الرحيل. وبعدها اجتمع مع والد الطفل على مائدة الطعام و شكره على استضافته ثم طلب الرحيل لتأخر قافلته التجارية، وعندما ذهب ليقبل الطفل اتفقا سويا على اللقاء عند صخرة بالقرب من الشاطئ.
السر في الدجاجة
كان اللقاء الأول عند الصخرة لقاء عاصفا فقد تأخر الطفل عن الموعد واعتقد الضابط أن جهده قد ضاع، ولكن من وقت لآخر كانت الآمال لا تفارق الضابط في الحصول على أسرار مواقع العدو، كانت الثواني تمر كأنها سنوات مملة حتى ظهر من بعيد جسد نحيف لقد كان الطفل «صالح» الذي جاء يبرر تأخيره بأنه اختار الوقت المناسب حتى لا يلمحه أحد، كان الطفل يعرف أن مهمته صعبة، ودوره خطير، وأن حياته معلقة على أستار أي خطأ يحدث، تلقى الطفل بعض التعليمات والإرشادات التي تجعله في مأمن وذهب ليترك الضابط وحيدا شارد الفكر يفكر في وسيلة تسمح «لصالح» بأن يتجول في مواقع الإسرائيليين بحرية كاملة حتى جاء اليوم التالي لموعد اللقاء مع الطفل صالح الذي كان يحمل معه بعض البيض من إنتاج الدجاج الذي يقوم بتربيته وما أن شاهد الضابط الطفل حتى صاح وجدتها انها الدجاجة التي ستمكنك من الدخول إلى مواقع العدو بدون معاناة أو شك فيك، إنها الدجاجة مفتاح السر لم يع الطفل شيئا، واندهش لصراخ الضابط الذي كان دائما هادئا، وجلسا على قبة الصخرة ليشرح له الفكرة التي ستكون الوسيلة لدخوله مواقع العدو والحصول على المعلومات بدون صعوبة أو شك في سلوكه. صداقات تركزت الفكرة في قيام «صالح» ببيع البيض داخل المواقع للجنود الإسرائيليين، وبالفعل تمت الفكرة بنجاح وبدأ الطفل يحقق صداقات داخل المواقع ومع الجنود لقد كان صديقا مهذبا وبائعا في نفس الوقت، وكان يبيع ثلاث بيضات مقابل علبة من اللحوم المحفوظة أو المربى، وداومت المخابرات المصرية على الاتصال به وتزويده بما يحتاج من البيض لزيارة أكبر قدر من المواقع حتى يمكن جمع المعلومات منها. وبعد شهر تقريبا بدأت مهمة الطفل في جمع المعلومات بطريقة تلقائية من خلال المشاهدة والملاحظة وبعد أشهر معدودة جذب عددا من الجنود لصداقته فكان يجمع المعلومات بطريقته البريئة من خلال الحديث معهم، كان في كل مرة يحمل مجموعة قليلة من البيض يبعها ثم يعود إلى منزله يحمل مجموعة أخرى إلى موقع آخر تعود على المكان وتعود عليه الجنود حتى أنهم كانوا يهللون فرحا حينما يظهر. ومع الأيام تكونت الصداقات واستطاع الطفل التجول بحرية شديدة داخل مواقع العدو بدون أن يحمل معه البيض كان يتعامل بتلقائية شديدة وبذكاء مرتفع لم تكن أبدا ملامحه تظهر هذا الذكاء، وظل يداعب الجنود، ويمرح معهم ويلعب الألعاب معهم، يستمع لما يقولون وكأنه لا يفهم شيئا وما أن يصل إلى الضابط حتى يروي له بالتفاصيل ما سمعه من الجنود، وما شاهده في المواقع بدون ملل. معلومات قيمة وبعد أربعة أشهر بدأ حصاد الطفل يظهر في صورة معلومات لقد استطاع أن يقدم للمخابرات المصرية ما تعجز عنه الوسائل المتقدمة، وتكنولوجيا التجسس وقتذلك. فقد نجح في التعرف على الثغرات في حقول الألغام المحيطة لأربعة مواقع مهمة بها المدافع الثقيلة بالإضافة إلى مولدات الكهرباء، ووضع خزانات المياه، وبيان تفصيلي عن غرف الضباط، وأماكن نوم الجنود وأعداد الحراسة الليلية، وكل التفاصيل الدقيقة حتى الأسلاك الشائكة، وكان يستطيع الطفل رسمها، ومع تعليمات ضابط المخابرات استطاع الطفل التمييز بين أنواع الأسلحة ظل الطفل يسرد للمخابرات ما يحدث داخل المواقع من كبيرة وصغيرة وبناء على ما تجمعه المخابرات من الطفل ترسم الخطط المستقبلية لكيفية الاستفادة القصوى من الطفل مع توفير أكبر قدر من الأمان والرعاية له. مضايقات كثيرا ما كان يتعرض الطفل أثناء احتكاكه بالجنود الصهاينة للمضايقات والشتائم وأحيانا الضرب من بعضهم لكن دون شك فيه، وكان ضابط المخابرات المصرية «كيلاني» يخفف عنه الآلام، ويبث فيه روح الصبر والبطولة وكان أصدقاؤه من الجنود الإسرائيليين أيضا يخففون عنه الآلام، وينقذونه من تحت أيدى وأقدام زملائهم، وكان من أبرز أصدقاء الطفل «صالح» ضابط يهودي من أصل يمني يدعى «جعفر درويش» من مواليد جيحانه في اليمن وكان قائداً للنقطة 158 المسماة بموقع الجباسات، ظل الطفل يتحمل مشقة المهمة حتى جاء شهر سبتمبر 1973 قبل الحرب بشهر واحد. وبعد اختباره في عملية نفذها الطفل بدقة عالية قام ضابط المخابرات المصرية بتزويد الطفل بقطع معدنية صغيرة، وتم تدريبه على كيفية وضعها في غرف قادة المواقع التي يتردد عليها وطريقة لصقها من الوجه الممغنط في الأجزاء الحديدية المختفية كقوائم الأسرة وأسقف الدواليب الحديدية، وكانت هذه العملية مملوءة بالمخاطر والمحاذير، وكان هناك تردد من قيام الطفل بها حتى لا يتعرض للمخاطرة، ولكن الطفل رغب في القيام بهذه المهمة وذهب وترك الضابط في قلق شديد. قلق وحيرة كانت تراوده الظنون التي لا تنقطع، ظل الضابط ناظرا إلى السماء لا يستطيع الجلوس في مكان حتى قاربت الشمس على المغيب فزاد القلق والحيرة والتساؤل: هل تم القبض على الطفل؟ لابد أنه يذوق ألوان العذاب الآن وما العمل؟ وكيف الخلاص إذا تم اكتشاف الطفل؟ كيف يمكن تخليصه من هذا العدو الصهيوني؟ ووسط هذه التساؤلات ظهر الطفل ليغمر وجه الضابط فرحة لا يمكن تصورها. لقد عاد بكامل صحته حاملا لعلامة النصر واستطاع إنجاز أصعب عملية في حياته ليسجل التاريخ اسمه، لقد مكنت العملية الأخيرة التي قام بها الطفل باقتدار المخابرات المصرية من الاستماع من خلال هذه القطع المعدنية التي بداخلها جهاز إرسال دقيق إلى كل ما يدور داخل حجرات القيادة من أحاديث وأوامر من كيفية التعامل مع هذه المواقع أثناء العبور، كما استطاع المصريون التعامل مباشرة أثناء المعركة مع هذه المواقع بتوجيه إنذارات إليهم للاستسلام. كل هذا ولم يكشف الضابط في زيه الإعرابي عن شخصيته للطفل وقبل الحرب بعشرين يوما وصدرت الأوامرمن المخابرات المصرية بنقل الطفل وأسرته إلى القاهرة، ولم يكن الأمر سهلا خاصة فقد نقل صالح وعائلته من الصحراء إلى القناة وتم عبورهم للقناة ومنها إلى «ميت أبو الكوم» حيث كان الرئيس الراحل محمد أنور السادات في استقبالهم وبعد أيام من نصر أكتوبر أدرك الطفل صالح مدى أهمية ما قام به من أعمال خارقة ساهمت في انتصارات أكتوبر ودخل صالح مبنى المخابرات المصرية فوجد الإعرابي المهرب مرتديا زيا مدنيا لتملأ الدهشة وجه الصغير، ويقوم الضابط «كيلاني» برعايته في التعليم ويدور الزمان ليجلس الطفل مكان «الرائد كيلاني» على مقعده وفي غرفته__________________

من ملفات المخابرات العامه المصريه
القصه كما وردت فى ملفات المخابرات وقام بنشرها على الشبكه السيد حسام عمر

2006-11-07T21:15:00.000+03:00

البطة وولادها

2006-11-07T21:12:00.000+03:00

حاجة تقرف

هذه هي الكلمة السائدة الآن في مصرنا الحبيبة

2006-10-12T14:07:00.000+03:00

كل يوم يطلع حد يشتمنا ويهزئ فينا( احنا المسلمين يعني) علي اساس ان اننا الحيطة المايلة في الدنيا دي

اول مرة الرسوم الدنماركية اللي اهانت الرسول الكريم -صلي الله عليه وسلم- وساعتها قامت المظاهرت الغاضبة في كل مكان واشتعلت السفارات واشتغلت المقاطعة اللي صحيح اثبتت فاعليتها لكنهم بردة لم يعتذروا اعتذارا واضحا وصريحا
تاني مرة لما أساء بابا الفاتيكان في محاضرة بألمانيا (اللي هية اكتر البلاد تعصبا ضد المسلمين) وقال ان الاسلام دين عنيف انتشر بالسيف وليس فيه اي منطق وساعتها بردة خرجت المظاهرات في كل مكان بس معرفناش نقاطع ايه ولكن لم يخرج عالينا الفاتيكان باعتذار واضح وصريح ولكنه اتهم المسلمين بالغباء وانهم لم يفهموا محاضرتة مع ان الكلام كان واضح جدا
المرة التالتة بقي وهو خبر نشر علي استحياء في الجرائد المصرية كانت عن اوبرا تم تحضيرها للعرض في اوبرا برلين اسمها"اندومنيو" لموزارت وفيها مشهد لرأس مبتورة لمحمد عليه افضل الصلاة والسلام إلي جانب رأس المسيح وبوذا والشيطان وقد تم تأجيل عرضها خوفا علي مشاعر المسلمين وف وسط الكلام وقع في ايدي جرنال اسمة "البايس" فيه خبرعن الموضوع قلت اما انشرة علي المدونة عشان قرائها يبقوا مثقفين ومميزين ودي ان شاء هتبقي خدمة جديدة(نقل الأخبار في الجرايد الاجنبية الي تقع تحت ايدي و تخصنا كعرب ومسلمين) المهم هذا هو ماتم نشرة بتاريخ 28-9-2006 معلش هوه بايت شويه في الصفحة الأولي:

ميركل تدين تأجيل عرض اوبرا في برلين خوفا من رد فعل الراديكاليين الإسلاميين

تدخلت أمس انجيلا ميركل في القضية المثارة بألمانيا بسبب تأجيل عرض اوبرا"ايدومينيو"لموزارت خوفا من تهديدات المتشددين الإسلاميين، وقد قالت المستشارة الألمانية ان الرقابة الذاتية بسبب الخوف هي شيءلايحتمل،فيجب علينا ان نأخذ بعين الإعتبار عدم التراجع امام عنف الراديكاليين و.

قد اثيرت تلك القضية أمس في برلين في افتتاح المؤتمر الأول حول الإسلام ،الذي تم تنظيمه من أجل تحسين العلاقات مع المسلمين

اما في الصفحة الداخلية فكان المكتوب كالتالي

ميركل تدين الرقابة الذاتية خوفا من رد الفعل

المستشارة الألمانية تعارض إلغاء اوبرا لموزارت خوفا من تهديدات المتشددين

في البداية كانت الرسوم التي أثارت غضب العالم الإسلامي ،ثم أقوال بنديكت السادس عشر في جامعة راتسبونا في محاضرة حول الإسلام والعنف مستشهدا بأقوال من العصور الوسطي0

وفي هذا الجو الملئ بالتنافر والخوف من رد فعل المتشددين الإسلاميين ،ظهر الآن الجزء الثالث :تأجيل عرض نسخة من اوبرا "ايدومينيو"لموزارت بأوبرا برلين حيث يبدو فيها المسيح ومحمد و بوذا مقطعي الرأس 0

وفي نفس الوقت ، في الدنمارك،ظهر كتاب يعتبر الإسلام الراديكالي مذهب شمولي مقارنة بالنازية والشيوعية وقد ازداد الإقبال علي هذا الكتاب بمجرد ظهورة 0

اما المستشارة الألمانيةانجيلا ميركل فقد انتقدت أمس قرار الأوبرا الألمانية في برلين تأجيل عرض اوبرا"ايدومينيو" لموزارت خوفا من رد فعل المسلمين0

وقد صرحت ميركل لجريدة "لنيوسبرس"في هانوفر ان الرقابة الذاتية بسبب الخوف هي شيء لا يحتمل،فيجب علينا ان نهتم بعدم التراجع كل مرة خوفا من عنف الراديكاليين0

و قدانتقد سياسيين من كل الأحزاب السياسية هذا التأجيل لعرض اوبرا "ايدومينيو" لموزارت حيث تعرض رؤوس

ملطخة بالدماء لمحمد والمسيح و بوذا و الشيطان0

وتلك هي ثالث مرة -إثر الصراع الذي نجم بعد نشر الرسوم الكاريكاتورية حول محمد في جريدة دانماركية والنقد الذي تعرضت له خطبة البابا في جامعة راتسبونا-تثيرفيها ظاهرة ثقافية او اجتماعية غربية المواجهة بين احترام الإسلام الذي يطالب به المسلمين وحرية التعبير التي تدافع عنها المجتمعات الغربية 0

و قد أكدت اوبرا برلين علي أهمية دوافعها للفنانيين والجمهور بالرغم من انها لم تتسلم تهديدات محددة. ومن الجدير بالذكر ان هذا المشهد كان قد استحدث ل"ايدومينيو"في عام 2003دون ان يثير اي اعتراض وقد كان أحد الذين شاهدوه في ذلك الوقت وزير الداخلية الحالي "ولفانج شاوبل" الذي يعتبر هذا التأجيل غير مقبول وقد صرح أمس انه يجب ان ندافع عن الحريات، حرية الصحافة،وحرية التعبير الفني التي اصبح الدفاع عنها مثله مثل محاربة التعذيب، كما أضاف انه لا يجب ان نبدأ نحن بذلك وأضاف حول مسأله "ايدومينيو" علي وجة الخصوص ان من لا يعجبة العرض فليعبر عن استنكارة له0

اما مسألة الرقابة الذاتية فلن تسنح فرصة أفضل من ذلك لمناقشتها حيث افتتح امس في برلين المؤتمر الألماني حول الأسلام بهدف الوصول لاتفاق بين المجتمع الالماني والمسلمين الذين يعيشوا في البلاد حول قبول واحترام الأسس السياسية ،و الاجتماعية والدينية من أجل التعايش0

المؤتمر الذي ضم 15 ممثلا من الدولة ومثلهم من الجالية الإسلامية سيستمر لسنوات قادمة و قد مهدت له اجتماعات مصغرة من أجل حصر مكاسب مجموعات العمل التي بدأت المناقشة أمس حول بناء المساجد، والتعليم الإسلامي ،والمساواة بين الجنسين0

وقبل افتتاح المؤتمر أعرب "شاوبل" عما يتمني ان يحققه المؤتمر في مقالة مطولة تم نشرها في صحيفة" فرانكفورتراليماني زيتونج" وقد سمي في مقاله المسلمين بمسلمي المانيا وأشار للفوائد التي يجلبوها للمجتمع الألماني وهو ما تحاول ألمانيا الحفاظ عليه كأهمية الأسرة،احترام الكبير،الضمير،الافتخار بتوحد التاريخ،الثقافة،العادات،الحياة اليومية لنفس العقيدة الإسلامية .ودافع عن تدخل الدولة في تشكيل ائمة المساجد لأن هذة المساجد الألمانية تقدم العظة أولا وأخيرا لأفراد ألمان0

ومن المعروف انه يعيش في ألمانيا وحدها 3،2مليون شخص ذو ثقافة اسلامية، أغلبهم من أصول تركية بالرغم من أنهم ليسوا جميعا ممن يمارسوا شعائرهم الدينية

و بسبب عدم وجود ممثل وحيد للمسلمين فقد دعي وزير الداخلية للمؤتمر القائمين علي خمس جمعيات متواجدة علي الساحة وتتنافس فيما بينها من أجل فرض سلطتها امام المجتمع بالرغم من تمثيلهم فقط من 10%إلي 15%من نسبة المسلمين المقيمين بألمانيا

وذلك جنبا إلي جنب مع ممثلي المسلمين غير ممارسي شعائرهم وقد كان معيار الإختيارمرتكزا علي التناقض حتي قبل بداية المؤتمر فقد صرح مدير الأرشفة الإسلامية "محمد سالم عبدالله"ان ذلك يبدو مثل دعوة الملحدين للتحدث عن المسيحية ،فكيف يمكن ان يشارك من يقول انة لايمارس اي دين.كما تساءل عن ذلك ايضا رئيس المجلس المركزي للمسلمين "أيوب أكسل كوهلر" في اجتماع مع جمعية المراسلين الاجانب كما أوردت ساندرا اليخيرز0

وفي نهاية افتتاح المؤتمر علق المشاركين بارتياح بأنة يوم تاريخي ونقطة تحول .وقد أعلن "شاوبل"ان الجميع كانواعلي اتم اتفاق ان تأجيل الاوبرا كان خطئا

وقد طالب المشاركين الثلاثين بالإجماع ان تعرض "ايدومينيو "وتعهدوا جمعيا بمشاهدتها معا

2006-10-07T01:05:00.000+03:00

تقبل الله منكم الصيام والقيام

2006-09-30T17:41:00.000+03:00

اقلع غماك ياتور وارفض تلف
اكسر تروس الساقية... واشتم وتف
قال بس خطوة كمان.. وخطوة كمان
يا اوصل نهاية السكة.. يالبير يجف
صلاح جاهين

افرحي ياللي مانتيش غرمانة

2006-09-28T23:47:00.000+03:00

زغرودة يا بنات مصر ،افرحوا يا ولاد مصر ، زأطاطوا يا مصريين ، خلاص عمو جمال مبارك قرر ان مصر تدخل النادي النووي، السلمي طبعا، يافرحتي ، يا جدعان مش قادرة علي الفرحة دي كلها ، الدنيا مش سايعاني ،ما هو احنة اصلنا ناقصين بلاوي ، نووي اية بس يا جدعان هو احنا لاقيين اللقمة الحاف ، علي حد علمي ان المشروعات النووية دى بتتكلف مليارات مش ملايين ونبي احنا هنجبهم منين ولا انكل احمد عزوانكل المغربي هيسلفو الحكومة لحد ما تشد حيلها وتقوم علي رجليها وبعدين يبقيو ياخدوهم بالفوايد ،يالا انشالله ما حد حوش وبعدين مين يضمن لنا اننا مش هنصحي بعد كام سنة علي كارثة زي حوادث العبارة وقصر ثقافة بني سويف و حوادث كل يوم بتاعة السكة الحديد ماهم اللي بيشتغلوا هنا هما اللي هيشتغلوا هناك وساعتها مفيش حتة نجري فيها و اية التوقيت اللذيذ دة هما تقريبا والله أعلم عايزين يحببونا فيه بالعافية قعدوا يدوروا نعملهم اية ؟!نعملهم اية؟! نحسن لهم العيش ؟ لأ دول ما يستاهلوش اللقمة النضيفة... نرخص لهم فواتير المية والكهربا والتليفون و نزود لهم اسياخ الحديد والاسمنت .... اية يا جدع التخريف دة وناكل احنا منين ... طيب اية رأيكم نعمل لهم مشروع نووي زي ايران أهم يتلهوا فية ويفرحوا بدل ماهما طايرين بنجاد في السما السابعة يفرحوا بالبرنس بتاعنا ...بزمتكم مش احسن من نجاد ميت مرة ... قال نجاد قال، بلا نيلة هو فية احسن من المصري

2006-09-24T16:13:00.000+03:00

رمضان كريم

2006-09-24T00:43:00.000+03:00

حد شاف حسن نصرالله في احتفال النصر الالهي يوم الجمعة اللي فات لو في حد ماشفش، يقرا بقي الكلمتين دول
اية دة يا جدعان ،اية الراجل دة ، دة متهيألي محدش عندنا محترم بالطريقة دي،ولا عبد الناصر في عزة يا ناس ولا الجماهير الكتيرة اللي كانت بتسمعة دول تقريبا معظم سكان بيروت كانوا هناك ولا كلامه كلة كلام جامد أنا طبعا مش فاكرة كل كلمة قالها لكنة مثلا انتقد حركة 14 آذار وتصريحات وليد جنبلاط وطالب بتغيير الحكومة وانتقد دموع السنيورة واهم حاجة فاكراها انه قال ان سلاح المقاومة لن يبقي للأبد وانه لازم في يوم من الأيام ينزع أو يندمج في الدولة شرط ان تكون الدولة قادرة علي حماية نفسها وابناءها وحدودها وكام كلمة كدة من نوعية دمي فداء لكم، وروحي فداء لكم ،الحاجة الغريبة في الراجل دة انه ما بيغلتش وما بيديش فرصة لأعدائه عشان يوقعوة او يمسكة علية غلطة وكل الانتقادات اللي بيوجها لخصومة السياسين بيوجها بكل أدب واحترام وفي نفس الوقت بكل كرامة وعزة نفس ولكني حاسة ان كل دة في الأخر هينتهي بحادثة اغتيال او صاروخ طايش من اسرائيل يقع بالصدفة علية وكام كلمة شجب وتنديد من كل ناحية ....ودمتم

2006-09-21T13:22:00.000+03:00

قتل في العراق اكثر من 6 آلاف شخص معظمهم مجهولي الهوية خلال شهري يوليو واغسطس فقط وذلك بسبب العنف الطائفي الذي يجتاح البلاد و القتل للاشتباة ،في الوقت الذي يحاكم فيه صدام حسين بتهمة الإبادة الجماعية للأكراد في حادثة الانفال ،يا تري هل ممكن اللي بيقتلوا العراقيين دلوقتي يتحاكموا كدة زي صدام في يوم من الايام ............. علي العموم ربنا كبير وجزاءهم عنده ،

2006-09-18T20:43:00.000+03:00

زواج في خمسة أيام

اليوم الأول0
عندما رآها أول مرة علم انه وجد ضالتة المنشودة ،تمعن في نظراتها الخجولة فوجدها تبادله الإعجاب

اليوم التاني0

اقترب منها وصارحها بحبه لها وصارحته باحساسها، عندها لاحظ شيئا صليبي الشكل يتدلي من رقبتها ولكن ذلك لم يثنه عن حبه و لم يجعله يتراجع بل تمسك كل منهما بالآخر اكثر واتفقا علي الزواج

اليوم الثالث0

عندما صارحت اهلها ثاروا وهددوا واكدوا علي معارضتهم القاطعة ولكن ذلك زاد من حبها له

أما هو فحينما اعلن لأهله عن حبيبته استاؤا من اختيارة ووصفوه بالحمق والتهور ولكنهم سرعان ما أذعنوا لرغبته القوية واصراره

اليوم الرابع0

اكدت له ان لا سبيل له بها سوي الهروب والزواج بعيدا عن اهلها وقريتهم الصغيرة والحت عليه كثيرا ليوافق وعندما لم يري حلا سوي ذلك اتفقا علي الميعاد والمكان ورتبا كل شئ يبدآ به حياتهما معا ،بعيدا عن العيون التي تلاحقهما

اليوم الخامس0

عقدا قرانهما في مشيخة الأزهر بعدما اعلنت اسلامها لتتوحد مع حبيبها جسديا و روحيا وذهبا معا ليبدآ حياتهما،ولكن عيونا ابت ان تتركهما وظلت وراءهما

يتبع...

2006-09-18T20:39:00.000+03:00

قصر البارون

2006-09-11T19:04:00.001+03:00

البحر ورياحه