زهقاااااااااااااااااااااانة و طهقانة وقرفانة و السبب البطالة(حلوة دي تنفع مطلع أغنية لشعبولا)سبعتاشر سنة من عمري ضاعوا في المدارس والجامعات و المذاكرة والكتب والمحاضرات و الملازم والامتحانات والمراجعات والدروس اللي فلست اللي جابوني و في الأخر قعدت جنب أمي أقشر بطاطس و أحمر اللحمة وأعمل السلطة ،طب ده أنا لو أعرف ان أخرتها كده مكنتش اتكفيت طول عمري علي الكتب والمذاكرة (أصل أنا كنت دحيحة بعيد عنكم) وكنت عشت أحلاها فترة مراهقة في فسح و خروجات وأروش نفسي بقي، ماهي الحكاية مش جايبه همها.
أنا حاسه دلوقتي أن دماغي بتغلي و لو قست الضغط ممكن الجهاز يطق يفرقع في وشي ،كل ده عشان عاوزة أشتغل في تخصصي ،اللي درسته في الكلية واللي قربت أنساه ،لكن ازاي لازم الواحد يطلع عين اللي جابوه قبل مايترستأ في شغلانة تستر عليه قبل الفضايح .اللي عاوز خبرة عشر سنين واللي يقوللي الحجاب اللي علي راسك ده ما ينفعش تشليه ،جوه الشغل بس ابقي البسيه بره زي ما انتي عاوزة ،بالذمة ده كلام ناس عاقلين .لأ ومش ناقص كمان غير الأزمة المالية اللي هتخلص علينا (اقصد الشعب الحبيب المسالم)لأن الناس التانية مش هتفرق معاهم تلاتة أربعة مليار خسارة، لكن في الأخر برضة أنا واثقة ان الحكومة هتوفر فرص عمل للشباب العاطل مش علشان دي مسئوليها لأ لأن ببساطة الايد البطالة نجسة ،حد يبص كده مره علي الوظايف بتاعة اعلانات الحكومة اللي بتتباهي بيها في الجرايد هتلاقي مطلوب نجار مسلح ،مطلوب خياطة ،مطلوب كهربائي .أنا مش بأقول ان الناس دي ماتشتغلش بس برضة فين مطلوب مهندس ،مطلوب طبيب ،مطلوب محامي ،الناس دي هما اللي بيطلع عنهم علي مايلاقوا شغلانة محترمة ،كريمة ،و ربنا يبارك لنا في الحكومة النظيفة الطويلة.
