الجوع كافر

عمرو خالد عامل مبادرة للقضاء علي الأمية في مصر و محمد صبحي عامل مبادرة لحل مشكلة العشوائيات ،طب والجوع؛ ازاي تقنع واحد مش قادر يقف علي حيلة من الجوع انه يختار مثلا أبو الفتوح للرئاسة طب اديله رغيف عيش عشان حتي يعرف يسمعك جايز بعد كده يقدر يفهمك و يكـون رأي خاص بيه ؛ حوالي 14 مليون مصري بيعيشوا تحت خط الفقر يعني دخلهم أقل من دولار واحد في اليوم يعني حوالي 5 جنية في اليوم تفتكرأي أم منهم ممكن تكون بتدي لولادها كل يوم الصبح كوباية لبن و سندوتش جبنة قبل ما يروحوا المدرسة ده علي أساس انهم بيروحوا المدرسة أصلا. فين ضميرك وانت نازل توزع دقيق و عيش وخضار بين ناس فقرا عشان ينتخبوك في المجلس و انت عارف وهم عارفين ان ده الوقت الوحيد اللي ممكن يلاقوا فيه ياكلوا.

لما تلاقي واحد جعان متكلموش عن الماده الثانية في الدستور وأهميتها و عن حركة 6 أبريل وعن ضرورة اسقاط المجلس العسكري متكلموش عن كل ده لأنه مش هيسمعك لأن الجوع سد ودنه و لغي عقله . حل مشكلته الأول وبعدين خليه يحل مشكلتك في عدد الأصوات في الصندوق .مش مجرد انك تتبرع بقرشين زياده عن حاجتك لبنك الطعام تبقي عملت اللي عليك الناس بتموت من الجوع حرفيا . وربنا هيسألنا عن اهالينا اللي بتموت من الجوع واحنا مش بنعمل حاجة، محدش يسألني طب إيه العمل لأني أصلا مش عارفة نعمل ايه أنا كل اللي عارفاه ان الوضع ده غلط ولازم يتصلح ازاي معرفش بس ياريت اللي يعرف يقولي أرجوكم .

السلام عليكم ازيكم معلش غبت عنكم شوية ...امم هما شوية كتير الصراحة بس معلش و الله بعوده ،علي أساس ان كان فيه ३ مليون قارئ للمدونة المنحوسة دي معلش خلوني عايشة في احلامي، محدش يصحيني، أنا انقطعت عن الكتابة وحسيت ان مفيش فايده من الكتابة علي الأقل بالنسبة لي ،كمان الأحداث في الفترة اللي فاتت كانت متلاحقه بسرعة رهيبة فحبيت اكون في موقع المشاهد لأنه بصراحة اريح وأحلي و كمان الفيس بوك ما خلا ش لاصحاب المدونات حاجة ، أنا ما كنتش ناويه أرجع للكتابة لكن لقيت أفكار كتير جدا في دماغي عاوزة أشارك أي حد فيها و لقيت أن أحسن حاجة اني أرجع أكتب من تاني " متردده" أنا عارفة لكن برضه بيقولوا الرجوع للحق فضيلة ، تلك كانت مقدمة موضوعيه و استهلال لابد منه (-;

احساس غريب بيتسلل جوه قلبي مبسوطه منه لكن برضة خايفة ، خايفة اقوم الصبح ألاقي نفسي في يوم عادي بدل ما كنت باستمتع باشارات المرور والزحمة و اعتبرها فرصة للتأمل في الدنيا وأحوالها ،و الخناقات في الشغل مجرد اختلاف في وجهات النظر والدنيا بمبي في بمبي، خايفة أقع علي جدور رقبتي و ما ألاقيش حد يمد لي ايده ...نفسي الاحساس بالرضا ده يستمر ادعو لي انه يستمر..

في وسط زحمة رمضان و العزومات و الخروجات و الأكلات في ناس تانية بتموت من الجوع و الألم والمرض في باكستان و مع الأسف محدش حاسس بيهم ، علي الأقل في مصر ......

تخيل ربع مساحة باكستان الشاسعة مغطاه بمياه الفيضانات بما فيها الأراضي المزروعة يعني كمان معظم المحاصيل الزراعية باظت ، بلغ عدد المتضررين 20 مليون شخص فقدوا منازلهم و شردوا و فقدوا اقاربهم ،1500 حالة وفاه ، و 650 ألف مشرد معظمهم من الأطفال و النساء تحيط بهم الأمراض الخطيرة من كل جانب و نقص الطعام و الشراب والمأوي .





أنا علي حد علمي باكستان دولة صديقة و مسلمة واجب علينا مساعدتها في الكارثة دي ، وحتي لو مش صديقة و مش مسلمة برضو واجب علينا مساعدتها بجد ،مش مجرد طائرتين سد خانة عشان لو حد سألنا نبقي عملنا اللي علينا ... بلاش فلوس عشان ما معاناش ،علي الأقل يكون فيه مستشفي ميداني في الأماكن المتضررة ونبعث دكاترة و مهندسين و بناءين متطوعين عشان يساعدوهم يبنوا نفسهم من تاني بسرعة ...و متهيألي كده تبقي صدقة في رمضان ولا ايه...

حسبي الله ونعم الوكيل في الظالم

في أوروبا و الدول المتقدمة

لما درجة الحرارة في الكام يوم دول توصل لحد 45 وفي بعض المدن 47 و 50 كمان ( أسوان) و ناس بتموت من الحر http://www.masrawy.com/News/Cases/General/2010/june/21/death.aspxوناس يغمي عليها من الشمس ده غير طبعا ضربة الشمس اللي بقت عادي خالص و الحكومة عاملة نفسها مش واخدة بالها من حاجة و و ودن من طين و التانية من عجين و امتحانات الثانوية العامة والكليات المختلفة مستمرة في ظروف غير أدمية بالمرة و فصول وقاعات مفيهاش ابسط وسائل التهوية ولا حتي مروحة ده غير طبعا صعوبة الامتحانات اللي ترفع الضغط لوحدها ، اللي أعرفة و اسمع عنه من زمان ان الحرارة لما تزيد عن 50 درجة مئوية تبقي أجازة رسمية مدفوعة الأجر لجميع القطاعات أو علي أقل تقدير ينبهوا علي الناس في كل مكان علي أهمية شرب الميه و السوائل والابتعاد عن الشمس المباشرة و ارتداء الملابس المريحة و النضارة الشمسية و ياريت لو في كريم مضاد لأشعة الشمس يبق أحسن وا حسن و يا سلام لو يوزعوا علي الناس زجاجات مية مجانا في الشوارع و شمسيات ان شاء الله حتي ورق و يحاولوا يقللوا من زحمة الواصلات و يوفروا أتوبيسات كتيرة للناس عشان ما يقفوش في الشمس كتير و تندات في المواقف للحماية من الشمس و يعلنوا حالة الطوارئ في المستشفيات خاصة لحالات كبار السن و الأطفال ........ياااااه أسفه جدا يا جماعة أنا سرحت و نسيت اني باتكلم عن مصر.

و من أحياها فكأنما أحيا الناس جميعا

هو لسة فيه كدة، لسة فيه حد بيمد لك ايده و يلحقك قبل ما تغرق بلحظة ... بهفوه ... بفسوة ... أنا كنت فاكرة ان الناس دي خلاص موضة وانتهت ، لكن لسه فيه ... لسه في حد ممكن يندهلك و انت خلاص هاتقع و يمد لك ايده و يبتسم و يساعدك أكتر حتي من مقدرته ، حد ممكن تحمد ربنا انك تعرفة ، وان ربنا زقه في طريقك لسبب معين ما تعرفوش لكن بعد فترة تدرك حكمته ... و تبقي مش عارف تعمل ايه ولا ايه عشان تشكرة .......... بالرغم من سواقين الميكروباص و غباوتهم ، وموظفين الحكومة و غلاستهم ، و لميس الحديدي و عمرو عبد السميع و تناكتهم .... مصر لسة ناسها بخير والله بخير ....