الخميس، يناير ٢٥، ٢٠٠٧

سعادة الوزيرة

دايما باتبهدل في المواصلات بمعني اني اقف استني الاتوبيس او الميكروباس ساعتين تلاتة لحد مايجي وبعد كدة تبدأ مرحلة جديدة من الشقاء ،تبدأ بمزاحمة قوي الشعب العامل من اجل الوصول الي الباب ، الباب بس ،الي هوه اهم حاجة ما دام وصلت له يبقي اعتبر نفسي وصلت محطتي،ومش مهم طبعا ايه اللي بيحصل جوة الاتوبيس او الميكروباس من معاناة وكدح في سبيل الوصول الي الهدف المنشود ولكن برضو مش عاوزه انسي الاوقات الحلوة لما أكون في حالة لا تسمح بهذا الكم من البهدلة ويكون في جيبي قرش بأقف في وسط الشارع وبكل ألاطة الدنيا اشاور لأي تاكسي علشان كدة في كل لحظة من اللحظات دي باتمني اني أكون وزيرة مواصلات ولو لسنة واحدة -معلش اصلي طماعة شوية- ودة لأني حاسة ان حل المشكلة دي محتاج ان الوزير يكون مطحون في المواصلات زينا عشان يعرف ايه اللي ناقص فيها ،شوية حلول بسيطة لكن تأثيرها كبير ، أقولكم مثلا شوية قرارات هاتخدها
مثلا،محطات الاتوبيس والميكروباص لازم تكون واضحة ومميزة في أماكن محددة ويلتزم بيها السواقين والركاب
تاني حاجة:زيادة عدد الاتوبيسات وخاصة في اوقات الذروة وفي الاماكن الزحمة زي وسط البلد وجمهورية شبرا العظمي
بعد كدة، نقدر نثبت مواعيد للاتوبيس بحيث تكون متوافقة مع مواعيد المدارس والجامعات والمصالح الحكومية والاعمال بشكل عام
وكمان يقتصر عدد ركاب الاتوبيس في كل رحلة علي عدد الكراسي يعني يكون مفيش حد واقف غير الكمساري وبس ودة ممكن يحصل في حالة ان الاتوبيسات تكون كافية ومواعيدها مظبوطة يعني اللي يلاقي اتوبيس مليان مفيهاش حاجة يستني عشر دقايق وياخد اللي وراة عشان يقعد فيه ويستريح بس طبعا ده هيحصل لوكان متاكد ان اللي وراه هيجي في معادة وفاضي كمان
اما بقي بالنسبة لمواقف الاتوبيسات فلازم تكون نظيفة ومريحة ومليانة كراسي لأن كتير اوي من روادها من كبار السن
اي رأيكم في شوية القرارات الحلوة دي
بس بما ان عمري ما هاقدر احققها انا قررت اريح نفسي واشتري عربية واتعلم السواقة مش بالذمة اريح
ياااااااااااه أخيرا الامتحانات خلصت ولو ان معظمها كان بايخ ورخم وربنا يستر علي النتيجه ،مش عارفة ليه انا بدأت احس بالغباء في الكلية دي وبالدات السنة دي مع اني كنت من المتفوقين في الثانوية العامه ،لكنها بردو مش مقياس ،دة مدرس الرياضة كان سعات كتيرة أما يزهق من الشرح يحفظنا المسائل وأهو كله ماشي، علي العموم انا مش هاوجع دماغكم بحواديت المداكرة والكلية والامتحانات خلاص المهم ان احنا خلصنا علي خير ورجعت لقواعدي سالمة بعد ماوحشني التدوين واصدقائي الافتراضيين بصراحة انا كنت ماسكة نفسي بالعافيه عن الكمبيوتر وكل ماعدي من جنبة شوشو(الشيطان) يوزني ويقول لي ما تفتحيه ربع ساعه هيحصل ايه يعني وامد ايدي علي زر الباور وخلاص هادوس لكن ارجع أفكر الكمبيوتر بطئ وعقبال ما يحمل صفحه تكون فاتت نص ساعة فطبعا هازهق واقوم فاتحة اي لعبة من اللي يحتاجوا لساعتين فما فوق وفي الأخر هاقوم من غير ماكون عملت حاجة غير اني ضيعت وقت وخلاص. و أحيانا كنت باسمع كلام شوشو علي اساس ان ايه يعني ساعتين تلاتة لكن المهم بعد كل ده ان الفترة دي عدت علي خير ومش مشكلة اني جاللي انيميا ووشي اطبق علي بعضه وبقيت عامله زي بتوع المجاعات لكن مش مشكلة بحلتين محشي كل شيء يرجع لأصله
ودمتم