كل سنة وانتم طيبين...........خلاص رمضان جانا بكل حلاوتة وبهجته وجماله.....جانا بزحمة المواصلات في الحر والجوع وخناقات البشر اللي مش طايقة بعضها وفي نفس الوقت صبرهم وتحملهم واخلاقهم الجميلة اللي ما بتطلعش غير في رمضان والقرآن اللي في كل ايد.... والبنات اللي بتبطل تلبس الهدوم المحزقة والملزقة والولاد اللي بيبطلوا المعاكسة في خلق الله ويغضوا بصرهم ....وجانا كمان بزينة الشوارع والجوامع والمآذن والفوانيس المتعلقة في كل مكان...... وأذان رمضان بصوت الشيخ محمد رفعت اللي مفيش احلي منة واللمة علي الفطار وريحة الأكل اللي يجنن والخشاف والقمر الدين والتلات بلحات اللي لازم يتاكلو قبل الفطار ومفيش مانع يبقو خمسة ستة.....واللمة علي التلفزيون والضحك علي البرامج والمسلسلات الكتيرة وفي الأخر نستقر علي مسلسل واحد نتفرج عليه ........ولمة الولاد الصغيرين وهما مستنين بكار عشان ياكلوا مع الكبارو بيلعبوا مع بعض وكل واحد يعاير التاني ويقول له يا فاطر رمضان يا خاسر دينك القطة السودة هتقطع مصارينك ..يا صايم رمضان يا حامد ربك القطة البيضا هتبوسك من خدك ......والرجالة لما يلموا بعض عشان يصلوا العشا والتراويح في الجامع والستات يصمموا انهم يروحوا معاهم لأنهم مش اقل منهم.... وريحة الفول والزبادي ساعة السحور والانتظار الطويل للفجر عشان نصلية وننام ونصحي نصوم من جديد.....لكن اوحش حاجة في رمضان انه شهر واحد.....المهم تقضوه علي خير
هناك تعليقان (٢):
كل سنه وانتى طيبه
والامه الاسلاميه بخير
نسأل الله أن يبلغنا ليلة القدر ويجعلنا ممن قامها إيماناً واحتساباً فغفر له ما تقدم من ذنب
و نسأل الله تعالى أن يجلعنا ممن يتقبل صيامهم وصلاتهم وقيامهم على الوجه الذى يرضيه عنا
وان يجعلنا من عتقاء شهر رمضان
اللهم آآميين
ورمضااااااااااااان كريييييييييييييييم
رمضان كريم
تحياتى
سلام
إرسال تعليق