انا في اجازة لمدة اسبوع وعند العودة ان شاء الله نستأنف التدوين

مسجد الحسين

مئذنة الحسين

خان الخليلي

حاجة غريبة

خبر غريب او بمعني اصح حاجة غريبة طالعتنا بها جريدة الجمهورية في عددها ليوم السبت 26 اغسطس 2006 في صفحتها الاولي تحت عنوان(كريمة الارملة الشابة رفضت الزواج حرصا علي بناتها الخمس) مع صورة لتلك المذكورة و طبعا العنوان ممكن يدل علي انة خبر لشكوي او طلب اعانة او حتي حادثة ولو بسيطة لكن كل دة لم يكن موجودا، فقط كان موجود قصةحياة تلك الارملة مع اسماءلبناتها الخمسة وازواجهم وكلياتهم، ولو ان الست كريمة واحدة من صانعي القرار او نجوم المجتمع او الفن كان ممكن يكون خبر مهم ولكنها تبدو انسانة عادية ليس لها اي شأن او تأثير في حياتنا ولكني لم افهم ابدا ما هو مغزي الخبر او اهميتة حتي يحتل مكان مهم وبارز في جريدة مهمة مثل الجمهورية ولكن التفسير الوحيد لذلك هو انها ممكن تكون قريبة لأحد من المسئولين بالجريدة ممكن تكون اختة او قريبتة او حتي خطيبتة وفكر انه يبعتلها عربون محبة بموضوع عنها وصورة من ايام الشباب لكن هي الجرائد القومية خلاص بقت مكان لتبادل المجاملات علي حساب القارئ والاخبارالحقيقية التي تستحق النشر فعلا

ساعة المغربيه

طبعا كل المصريين تابعواعملية نقل تمثال رمسيس من ميدانة الي مقر المتحف الجديد والمتابعة دي لم تكن لاهمية الانجاز الكبير والمعجزة اللي حققها شعب مصر وكأنهم هدموا الهرم وبنوة من جديد سوبر لوكس ،لكن لأن مكانشي فية حاجة في التلفزيون ولا الراديو غير البث الحصري لنقل التمثال(الحمد لله ان عندي دش وعلي فكرة ماجاش اي ذكر للموضوع غير في الاخبار الخفيفة) وبصراحة كدة انا مش شايفة اي انجاز او معجزة في النقل دة وما اعتقدشي انه لما اتنقل سنة1954 لميدان رمسيس حصلت كل الهيصة بتاعة اليومين دول

ولأن المذيعين في التلفزيون وخاصة الراديو لم يجدوا ما يتلونة عل مسامعنا طوال اكثر من عشر ساعات فاستضافوا بعض اساتذة التاريخ علشان يحكوا للناس علي اساس يثقفوهم، واهو كلة علي الله، عن الملك رمسيس لدرجة اني حفظت قصة حياة الاخ رمسيس من ساعة ماكان نونو صغنون في البلاط الملكي ولما اتجوز وخلف اكثر من 100 عيل او امير ولحد ما مات، ومن ضمن كلامهم عرفت انة حكم اجدادنا المصريين اكثر من67 سنة متواصلة من غير ولا سنة راحة شوفتوا العظمه و المصريين ساكتين وراضيين، علشان كدة ومن باب اولي ان احفادهم يكونوا علي نفس الدرجة من الصلابة والاحتمال وبلاش دلع ،بقي مش قادرين نستحمل كام وعشرين سنة من ازهي عصور الديمقراطية والحرية ومستكترين علي الباشا انة يقفلهم تلاتين سنة دة انتو كدة مش مصريين ابدا ولا هو كتير عليه ومش كتير علي رمسيس

عيّطي يا بهية على الشهدا طيارة وعبارة واوتوبيس

ماهو كل يومين نسمع نقرا أخبار سودا ونحلم كوابيس

خد عندك قال قطر يوللع والناس قاعدين من غير فوانيس

طيارة ف أمريكا تودع أرواح مدفونة ف بحر غطيس

طب فين الصندوق الأسود قال يابني بلاش فتوْ وتهجيص

مش احنا اللي نبيع ف عيالنا طب مين ب يبيع لطفك يا مغيث

وبقينا أرخص مخاليق ف الكون بيلموا جتتنا ف حتة كيس

ولا أحنا عشان 70 مليون شايفين اننا عايزيين تخسيس

وده ليه معرفش يا ناس حالنا مايل وعليه ناصبين متاريس

كل ما نيجي نشد ف حيلنا يطلع لنا واحد م الأباليس

وآخرها كمان جات عبارة هلكانة وماشية بدون تراخيص

وصاحبها مظبط ف أموره مسنود بحصانته واطي خسيس

قطفت أرواح ألف وحبة وابن الكلبة طايح ف باريس

طب فين حكومتنا المحترمة ضارباها صرمة وهاتك تعريص

ما يا بخت ان كان البيه خاله يبقى حلاله ياكل ويهيص

وياحسرة يا مصر على الشهدا موضوع يهدا ويروحوا فطيس

عيّطي يا بهية على الشهدا طيارة وعبارة واوتوبيس

نقلا عن مدونة اسكندراني

تم اضافة عدد 59 قتيل و143 مصاب لمجموع ضحايا الاهمال في مصر وربنا يستر علي بقية المصريين0

هذة مجموعة مختارة من رسوم الكاريكاتير للفنان ناجي العلي (رحمة الله) كانت خاصة بالحرب علي لبنان ايامه ولكني رأيت انها تناسب ايضا الحرب علي ايامنا فلم يتغير شيئ سوي عدد القتلي ....ولكنها المرة دي انتهت بالنصر لحزب الله واتمني ان يستمر هذا النصر ولو اني اشك فاعداء النصر اكثرهم من العرب0

الحرب خلصت اخيرا
مبروك النصر يا مسلمين

اشمعنا المصريين

منذ اليوم الأول للحرب علي لبنان الجميلة وحتي اكتمال شهرها الأول ،خرجت المظاهرات المنددة بالعدوان الصهيوني في جميع عواصم ومدن العالم وخاصة مصر وبالتحديد القاهرة التي خرجت منها مظاهرات عديدة بالأزهر وميدان التحرير والعديد من النقابات المهنيه وبدأ التبرع في جميع المحافظات المصريه لمساعة الشعب اللبناني المكلوم وقد شاهدت العديد من تلك المظاهرات من بعيد كشأن كثير من الناس غير اني كنت أود من اعماق قلبي المشاركه باحداها وهالتني الجموع الكثيرة التي كانت تندد بالعدوان والعدو الصهيوني و صمت الدول العربية غير اني تذكرت في هذة الاثناء كم البلاوي الملقي علي عاتقنا نحن الشعب المسكين خاصة مع زيادة الاسعار علي السلع المختلفة ولاسيما البنزين الذي بمقتضاة زادت اسعار السلع والخدمات اضعاف مضاعفة وتساءلت لما لم يخرج الشعب المسكين للتنديد بتلك الزيادة في الأسعار بدلا من الخوض في قضية بعيدة بعض الشئ عن المأساة الحياتية اليومية للناس العادية برغم التعاطف الكبير مع القضية اللبنانية ،كان من المفروض ان تخرج الجموع الغفيرة معترضة علي زيادة الاسعارعلي اساس انة يمس قوت ابناءها ولكن لا حياة لمن تنادي فقد نجح النظام في تلهيتنا بالحرب وجاءت الزيادة في وقت مشغول فية الجميع بالصراع العربي الاسرائيلي فقداتسم الناس في الفترة الاخيرة بزيادة التعليم او الجهل المطلق واختفي الحد الادني من الوعي بين المواطن المصري العادي فدكاترة الجامعةلا يتكلمون في المسائل التي تختص بالبسطاء ومعظمهم مشغول بالتحضير للمقابلات التلفزيونية للتعليق علي اخر احداث الحرب والبسطاء لا يستطيعون التعبير عن انفسهم او لا يريدون وفي خضم الاحداث ابتلع الناس الزيادة علي مضض ثم خرجوا للتنديد بالعدوان ولسان حالهم يقول اللي يشوف بلوة غيرة تهون عليه بلوتة0

يعرض حاليا علي قناة دريم 2 مسلسل رأفت الهجان في السادسة مساء(لمن يريد متابعتة) وبغض النظر عن انه قديم جدا (من عمري تقريبا) لكن انا بحب اتفرج عليه في المرات القليلة اللي بيتعرض فيها اولا لحبكته الدراميه الهايلة وثانيا لكمية التمثيل العظيم الموجود فيه و ثالثا ودة الاهم اني في كل حلقة من حلقاته بحس بالفخر بالانسان المصري اللي ضحك علي الصهاينه اكتر من عشر سنين وماقدروش يكشفوه وكمان كنت كل مرة باسئل نفسي يا تري لسة لحد دلوقتي في ادمغة مطأطأة في المخابرات المصرية زي الناس بتوع رأفت الهجان دول وبعدين ارجع أقول لنفسى اشمعنا يعني المخابرات اللي هتكون كويسة ما البلد كلها خربانة يعني هي جت علي المخابرات اللي هيبقي حالهاعدل

للشاعر/محمد بهجت
واحد اتنين الجيش العربي فين

الجيش العربي في مصر

ساكن في مدينه نصر

بيصحى من النوم العصر

وبيفطر شاي و منين

واحد اتنين الجيش العربي فين

الجيش العربي في سوريا

حالق عالموضه كابوريا

وعلى طريقه فكتوريا

خلى الترماي بدورين

واحد اتنين الجيش العربي فين

الجيش العربي الليبي

زي الفن التكعيبي

كله بتنجان يا حبيبي

الظاهر واخد عين

واحد اتنين الجيش العربي فين

الجيش العربي خليجي

ما فيه حيل لا يروح ولا ييجي

هذا صمت استراتيجي

اش فيك يا غراب البين

واحد اتنين الجيش العربي فين

الجيش العربي في تونس

اخضر مثل البقدونس

وعزيزه بتعشق يونس

يبقى الحروبات بعدين

واحد اتنين الجيش العربي فين

الجيش العربي سوداني

سامع رنته بوداني

هو انا هاهجم فرداني

يالا ارجع يا ابو حسين

واحد اتنين الجيش العربي فين

الجيش العربي اتهان

يوم ما انضربوا الافغان

وسكت في البوسنه زمان

واحد اتنين الجيش العربي فين

ماذا سيفعل مجلس الامن لهؤلاء؟