فجأه و علي حين غرة كنت عمالة اتفرج علي صور بعض صاحباتي علي الفيس بوك و ادركت ان معظم صاحباتي متجوزين أو مخطوبين و علي وشك الجواز أو علي الأقل مصاحبين وهيتخطبوا قريب و من غير الغيرة النفساوية للبنات ( مش لازم أحلف عشان تصدقوني ) في اللحظه دي لقيت نفسي بعيده شوية عن مشروع الجواز ده و عماله أفكر هيحصل ايه يعني لو متجوزتش و حصلت علي اللقب اللي كل البنات بتهرب منه "عانس " أنا عن نفسي مش هيبقي عندي أي مشكله طالما راضية عن نفسي و مبسوطة في حياتي ايه اللي هيزعلني .
لكن المشكله هتبقي في الناس اللي حواليا مش أسرتي الصغيرة علي الأقل لكن معارفي واصحابي و زملائي في الشغل اذا كنت لسه ما وصلتش للسن القانوني للعنوسة و لقيت ناس بتحرجني بأسئلة بايخة جدا اقل رد عليها يبقي بالسكوت ، ليه بس ياربي كل واحد ما يبقاش في حاله و ما يدخلش في اللي ما لوش فيه !! كنا كلنا هنبقي مبسوطين و نعيش في تبات و نبات ..لكن ازاي امال التباته و الرخامة لازمتها ايه .
- فلانة بنت طنط فلانة اتخطبت عقبالك يا حبيتشي كده ..انتي مالك اتأخرتي كده ليه ..طب دي يترد عليها بايه و نبي .
- ده أنا يا حبيبتشي قربت أولد و انتي لسه ما وقعتيش أي واحد ادردحي بقي و حطي عينك علي و احد و وقعية خليكي ناصحة.
و طبعا لا تعليق .
في بنات كتييييييير قوي في بلدنا عايزة تتجوز لمجرد انها تاخد لقب " المدام" بس مش مهم تتجوز مين ..هتكمل معاه و لا لأ هتعيش فين وازاي و السؤال الأهم بيحبها ولا لأ كل ده مش مهم في سبيل اللقب الغالي ممكن تضحي بكل ده .
أنا بقي مش كده انا عايزة اتجوز واحد بحبه و بيحبني يختارني لشخصي و اختاره لشخصه مش مجرد ضل راجل و نبني مع بعض بيت سعيد نملاه اولاد متفوقة و متربية تربية مصرية اسلامية أصلية نفتخر بيهم و يفتخروا بينا .
غلطت أنا بقي عشان بفكر كده، ممكن ابقي مثالية زياده عن اللزوم بس أنا معنديش مشكله لو محصلش كل ده اني ابقي لوحدي مع نفسي باحاول اسعد نفسي و اسعد اللي حواليا مستكترين عليا كمان أكون عايشة في حالي لنفسي بس .
ممكن تفكيري ده ما يعجبش حضرتك لكنه عاجبني و مبسوطة بيه كمان .
هناك تعليق واحد:
nice blog
إرسال تعليق