من رباعيات جاهين

حاسب من الاحزان و حاسب لها
حاسب على رقابيك من حبلها
راح تنتهي ولابد راح تنتهي
مش انتهت احزان من قبلها؟
وعجبي

ماتت دلوقتي حالا ،اتقتلت ،هي فتاة مصرية اسمها سماح عايشة في كرم أبو مصلح علي الحدود المصرية الاسرائيلية،اتقتلت برصاصة طايشة من القوات الاسرائيلية الحدودية ،يمكن يكونوا شوية عساكر كانوا بلعبوا نشان، خلاص بعد ما كانوا بيضربوا العساكر وحرس الحدود بقوا دلوقتي بيضربوا المدنين من غير ذنب ،و من امتي كان ليهم ذنب ،وطبعا لا تنتظروا أي اعتذارات، ولا أي ردود أفعال ،ومحدش هايفكر في الموضوع كتير ولا كأن أي حاجة حصلت ، الظاهر اننا ما لناش أي قيمة ،طب عند أعدائنا ماشي إنما عند أهلنا ،
ولسة ياما هتهون يا مصري ما دمت مصري .

زحمة يا دنيا زحمة

كان في صورة معينة دايما لما يتكلموا عن الصين بيجبوها في التلفزيون هي صورة الزحمة والناس الكتير اللي كلهم راكبين عجل و ماشين ورا بعض في تنظيم وهدوء رغم الزحمة الشديدة وصورة الناس اللي بتركب المترو أو واقفين علي المحطة مستنينه ،الصورة دي دلوقتي أصبحت في متناول جميع المصريين في أي وقت مش زي زمان وقت الذروة بس، لأي سبب بسيط تلاقي الشوارع كلها واقفة علي رجل حتي لو كان عيد الفالنتين وأنا متأكدة ان كتير من المصريين مايعرفوش الفالنتين دة بيبيع إية ،حتي المترو اللي كان وسيلة سهلة ومريحة بقي وسيلة عذاب وشقاء لأنك مش هتعرف تنزل في المحطة اللي انت عاوزها بسسب التدافع كان غيرك أشطر ،والزحمة دي بدأت تقريبا مع رمضان اللي فات ومن ساعتها والبلد حالها اتشقلب وكأن أهل القاهرة كلهم مش طايقين يقعدوا في بيوتهم ،عشان كدة أنا قررت أبقي مبادرة وأقعد في بيتنا كام يوم يمكن الزحمة تخف شوية.

يستحقوا النشر

بقالي كتير جدا ما كتبتش حاجة هنا، تقريبا حوالي شهرين ،كنت باتحجج بالإمتحانات وبحث التخرج -اللي لسة ماحتطش فيه قلم وربنا يستر عليا السنة دي-لكني في الحقيقة كنت زهقت من التدوين وتقريبا مش لاقية حاجة أكتبها وقلت لنفسي خلاص مفيش فايدة انتي اللي عندك خلص وكفاية بقي علي كدة ونفض المولد دة لكني في الوقت نفسه كنت متابعة كتير من المدونات الي محطوتين في ال favorites واللي باعتبرهم أصدقائي الحقيقين أو الخيالين يمكن حتي من غير ماهم يعرفوا لأني مش باعلق كتير واحب أكون قارئة في صمت ،ولما عرفت ان دار الشروق نشرت ثلاثة من المدونات في كتب طبعا نشر الكتب الثلاثة خلاني أتعرف علي المدونتين التانين والي لقتهم يستحقوا النشر فعلا ،كانوا فين دول من زمان وازاي ما كنتش أعرفهم ،أما بقي مدونة عايزة اتجوز فأنا باعتبرها صديقي الصدوق -علي رأي تيمون وبومبا -لأني قارئة مستمرة ليها و أول ما أخلص قراءة التدوينة أقول أمتي بقي تنزل التدوينة الجديدة وعشان كدة كنت متابعة موضوع الكتاب من عندها وكان نفسي قوي أشوفها في المعرض في حفلة التوقيع لكن معلش خيرها في غيرها ولما قالت إنها هاتطلع في العاشرة مساء برضة ما اشفتهاش لكني قلت لنفسي إنها أكيد هتنزل في المدونة لينك للحلقة وكل يوم أفتح وأبص علي الصفحة كأني مستنية النتيجة لكن بالقيها زي ماهي وأخيرا شوفتها،طبعا شكلها كان مختلف عن اللي في خيالي والشهادة لله شكلها هي أحلي ،كنت فرحانة بيها قوي كأنها بنتي ،أو كأني أنا الي في مكانها وقعدت أقول في سري ربنا يوفقك ،يمكن يكون دة كلام معجبين أحمد السقا وكريم عبد العزيز بس هو دة احساسي.

أول الشهر

ياااه أخيرا قبضت ده أنا كنت حاسس ان أول الشهر دة مش جاي الشهر دة، أما أمد شوية عشان ألحق الأتوبيس و لا بلاش أتوبيس أنا هاخد تاكسي النهاردة أحسن الفلوس تتسرق، بس التاكسي هياخد ستة سبعة جنية لأ وكمان هيتأمر عليا ومش هيرضي يدخل لأخر الشارع عشان السوق ، طاب أنا ذنبي ايه ماهي شبرا كلها أسواق ،أه الوليه كانت عاوزاني اجيبلها خضار وفاكهه أما أقبض ،لأ مش هاجيب دلوقتي أنا حيلي مهدود طول النهار هي تبقي تنزل تشتري اللي هي عايزاه ماهي قاعدة مستتة طول اليوم مش كفاية مارضيتش تشتغل عشان تساعد فيمصاريف البيت، أه ياني لسة المحطة بعيدة ولسه هاجري ورا الأتوبيس واتشعلق فيه ولا أخد تاكسي لأ لأ حرام ادفع ستةجنية في مشوار واحد عشاني انا لوحدي ،أنا هاكمل عليهم واجيب للعيال نص كيلو بسبوسة يحلو بيها بقهم ،مش كفاية مابيدقوش اللحمة إلا في المناسبات ،أنا هاخد ميكروباص أحسن اهو الواحد يبقي قاعد في مكانة ومحدش يقدر يهوب ناحيتة صحيح بابقي شايف الأسفلت من أرضية الميكروباص بس برضة أمان علي الفلوس.... أهو واحد جاي استعنا علي الشقا بالله ،
- حاسب ياأسطي.
-يالا ياعم اركب .
-دة مفيش مكان.
-معلش يا سيدي أقف .
-أقف ازاي بس ياأسطي هو في مكان للوقوف .......ما دام مفيش مكان وقفت لي ليه طيب؟
-وبعديين معاك يا أستاذ انت.... الحق عليا اني قلت ارحمك من اللطعة في الشمس والقرف ...وبعدين حتي لو نزلت هتدفع لي نص الأجرة خلاص ده احنا قربنا لنص السكة .
-ماشي ياسيدي أمري لله ....أجرتك أهي هي توصيلة ولا أكتر.


-يالا يا حضرات موقف ...موقف.
-يانهار أسود جيب البنطلون مقطوع أنا اتسرقت يااخوانا حرامي... حرامي.
-فين يا حضرة الحرامي دة .
-معرفش بس جيبي أتقطع والفلوس اتسرقت منه.
-خلاص ياسيدي لما تبقي تعرفة ابقي انده علينا واحنا نعدمهولك العافية دلوقتي بقي روح علي القسم واعمل محضر يمكن يلاقوا الحرامي بتاعك ....
-ربنا يعوض عليك .
-لا حول ولا قوة إلا بالله.
-معلش يا أستاذ .

رمضان كريم

كل سنة وانتم طيبين...........خلاص رمضان جانا بكل حلاوتة وبهجته وجماله.....جانا بزحمة المواصلات في الحر والجوع وخناقات البشر اللي مش طايقة بعضها وفي نفس الوقت صبرهم وتحملهم واخلاقهم الجميلة اللي ما بتطلعش غير في رمضان والقرآن اللي في كل ايد.... والبنات اللي بتبطل تلبس الهدوم المحزقة والملزقة والولاد اللي بيبطلوا المعاكسة في خلق الله ويغضوا بصرهم ....وجانا كمان بزينة الشوارع والجوامع والمآذن والفوانيس المتعلقة في كل مكان...... وأذان رمضان بصوت الشيخ محمد رفعت اللي مفيش احلي منة واللمة علي الفطار وريحة الأكل اللي يجنن والخشاف والقمر الدين والتلات بلحات اللي لازم يتاكلو قبل الفطار ومفيش مانع يبقو خمسة ستة.....واللمة علي التلفزيون والضحك علي البرامج والمسلسلات الكتيرة وفي الأخر نستقر علي مسلسل واحد نتفرج عليه ........ولمة الولاد الصغيرين وهما مستنين بكار عشان ياكلوا مع الكبارو بيلعبوا مع بعض وكل واحد يعاير التاني ويقول له يا فاطر رمضان يا خاسر دينك القطة السودة هتقطع مصارينك ..يا صايم رمضان يا حامد ربك القطة البيضا هتبوسك من خدك ......والرجالة لما يلموا بعض عشان يصلوا العشا والتراويح في الجامع والستات يصمموا انهم يروحوا معاهم لأنهم مش اقل منهم.... وريحة الفول والزبادي ساعة السحور والانتظار الطويل للفجر عشان نصلية وننام ونصحي نصوم من جديد.....لكن اوحش حاجة في رمضان انه شهر واحد.....المهم تقضوه علي خير